朱晨麗憶初來港住劏房：我冇用屋企錢！
撰文：東方新地｜圖片：新傳媒圖片庫、朱晨麗IG
朱晨麗 想搣甩「翻版陳法拉」
訪問中談及朱晨麗自細跳舞，係專業舞者，問佢跳開咩類型嘅舞？朱晨麗表示：「我跳拉丁舞、中國舞，最尾十歲先學芭蕾舞，一路變成一個專業嘅舞蹈員。其實跳舞好辛苦，會覺得係用汗水換嚟開心。Enjoy嘅係觀眾。譬如我有傷，都要捱痛，始終觀眾係畀錢買票，我都要對得住佢哋。」
放棄舞蹈 投身演藝
點解唔繼續舞蹈發展，轉而投身演藝？朱晨麗憶述：「嗰時我突然有一日問自己，點解跳咗咁耐舞依然喺度，諗會唔會做吓其他嘢，然後見到電視有港姐選美嘅promo，我就諗不如試吓，乜都試吓，橫豎都想試吓其他嘢，就遞咗表格，我喺香港冇乜親戚朋友，聽人講選美界可能需要有啲background或者有啲好勁嘅人提名，先可以入選，點知打電話嚟叫我面試，我仲諗係咪詐騙電話？我都唔知TVB喺邊，將軍澳？上網search，嘩，好遠喎！究竟係咪假㗎？去到，原來真係嘅！」
講到朱晨麗參選時係大熱門，佢笑言：「好彩、幸運，都要多謝啲傳媒幫我寫得幾好，我仲記得嗰時寫我係翻版蔡依林，又話我係跳舞界嘅尖子，都寫得好正面，以前睇好多八卦新聞，都有負面嘅新聞，點知對我都幾好喎，公司又覺得我都有潛質，就咁一路行落去。」但講得最多，當然話佢係「翻版陳法拉」，問朱晨麗見過陳法拉未？佢答：「有見過，我記得我選完，仲戴住個后冠，佢同佢媽咪入嚟後台，佢媽咪好熱情、好開心話：『哎吔，你哋兩個話好似樣，快啲一齊影張相！』之後到我哋喺《衝上雲霄II》合作，佢做機師，我做空姐，其實好少一齊嘅場口，但係啲工作人員就話：『翻版陳法拉呀，你有替身嘞！』我同法拉就望一望，我覺得我哋一啲都唔似囉，可能自己唔會覺得自己似另外一個人，但有呢個朵都幾好嘅，更加可以令人哋認識，但我都希望盡快可以搣甩佢，快啲有『翻版朱晨麗』啦！」
住過劏房
朱晨麗2011年選完港姐，2012年已經頂替受傷嘅法拉拍《名媛望族》，問佢覺得自己入行以來，發展成點？朱晨麗回憶：「嗰時啱啱選完入行，真係乜都唔識，唔好話演戲，對於娛樂圈、廣東話、做人處事，乜嘢都唔識，人都唔識，去到試鏡，有劇本畀我，都請埋資深嘅演員同我配戲，試戲嗰陣，一嚟就要我喊，我真係喊唔出，導演拉埋我一邊、講咗個秘訣畀我聽，佢話：『你諗吓屋企人，諗吓有啲咩比較傷心嘅事。』我即刻喊到收唔到，嗰次真係第一次釋放，第一次唔係因為某啲事而喊，之後就選咗我拍，話咁快有得拍劇，鏡頭同燈喺邊都唔識，so far公司一路畀好多機會我，今年又畀咗個獎我，好開心、感恩！」
朱晨麗又坦言中間都有捱過嘅階段：「我相信每個演員都有呢個階段。我選完之後，好多人認識，當去到演員嘅階段就需要轉變、點去磨練自己，因為以前跳芭蕾舞係唔需要同人相處嘅，日日都係見呢班人，去到一個新環境，點樣可以去融合佢哋、點樣可以去更加投入演戲？到依家都係磨練緊，廣東話都係。」
至於經濟上，朱晨麗直言自己其實好獨立：「我喺美國讀書時攞獎學金，每年都有攞，我嚟香港其實同爹哋嗌咗交，佢唔希望我去到咁遠，佢覺得點解要去到咁遠，跳芭蕾舞去上海咪得囉，去北京都得呀！我好倔強執著，一定要嚟香港，嚟到我無用屋企錢，自己試吓獨立，租劏房，學校畀我啲獎學金我就儲埋，我每日都會攞本簿計住搭咩車，我知道搭巴士貴過搭電車，就搭電車，早少少起身囉，可以慳番好多錢㗎！食下午茶平過lunch，等到下午茶嗰陣先食囉！但我一路都無話畀屋企人知住過劏房，如果佢哋知道會心痛囉，肯定唔畀我繼續落去。」
