朱晨麗

朱晨麗認同何廣沛有發展機會:等男仔主動

藝人專訪

廣告

2011年度港姐冠軍朱晨麗(Rebecca)、無綫萬千星輝頒獎典禮「最佳女配角」得主,在訪問中大方分享佢欣賞緋聞男友何廣沛嘅地方,但講到拍拖,佢就話:「感情嘅嘢唔可以求其,等男仔主動好啲!」

撰文:東方新地|圖片:新傳媒圖片庫、朱晨麗IG

朱晨麗讚何廣沛有上進心

訪問中問到朱晨麗嘅感情狀況,佢笑言:「感情好好,同工作拍拖。哈哈!同何廣沛嘅嘅關係?小東同二小姐囉!我哋等緊再續前緣㗎,因為套劇收得好好,同埋我哋呢個組合都幾受歡迎,都有人講,因為咁帶挈我哋出去做event都搵咗好多錢,我希望都可以再合作拍吓廣告。」

而講到何廣沛嘅優點,朱晨麗就大讚:「佢好勤力㗎、好有上進心,我自問都算勤力,因為我廣東話唔得,劇本我一定會標晒音,密密麻麻好多字,一定要背晒對白先入廠,但佢除咗咁,仲可以現場知道點樣改,個腦好快,應變能力好快,同埋佢好鍾意玩遊戲,呢排睇佢玩《降魔的》個game,幾叻!換著係我,已經畀人捉咗出嚟。」

私下有出街

同何廣沛有冇發展機會?朱晨麗直言:「有,二小姐同小東嘅戀情未畫上句號㗎嘛,我哋都好期待續集會點寫。但拍拖呢樣嘢都係隨緣啦,我覺得感情嘅嘢唔可以求其,我比較被動啲,等男仔主動好啲嘅。」至於私下有冇同廣沛去街?朱晨麗表示:「有出街,畀人影咗啦,話我哋好親密食飯,但係無相。哈哈!佢仲爭我好多餐!」

問佢平時會做咩?有冇做運動?朱晨麗就答:「我前日啱啱跳完Jazz,我近排搵咗林師傑嘅教練,因為拍《特技人》嗰陣,佢喺一個月之內,操到好大隻、好fit,我好佩服佢,日日我哋食飯,佢唔食,淨食雞胸,我覺得佢個教練應 該有啲辦法,所以我搵咗佢個教練,唔使練好大隻,操fit少少啦,做武打動作或者再要跳鋼管舞,好似阿Ben(袁偉豪)咁有啲肌肉,容易好多嘛!近排仲搵緊地方想做瑜伽。」