林淑敏「大小姐」上身：我做戲唔好，只係好彩
撰文：東方新地｜圖片：新傳媒圖片庫、林淑敏FB
林淑敏 選港姐為做幕後
在訪問中問到「大小姐」個角色咁有霸氣，觀眾喺街見到林淑敏時係驚定興奮？林淑敏笑言：「佢哋開心㗎，佢哋會捉住我嚟玩，叫我扮番『大小姐』個樣，問我『可唔可以擺番大小姐個樣派利是、可唔可以當出警告信畀我？』哈哈！我係enjoy嘅，佢哋睇得開心，我覺得係最大滿足感。」
講到林淑敏係港姐出身，佢話最初參選係因為搵唔到嘢做：「我大學讀電影，返到嚟搵唔到相關嘅行業，就去咗做空姐，做咗半年之後我都想試吓做自己讀嘅嘢，但冇門路，我喺無綫見咗兩次P.A.都冇請我，跟住咪選港姐，嗰時都懵懵哋，幾時決賽都唔知，唔知發生咩事。」
曾攞最奪目小姐
問佢落選有冇唔開心？林淑敏表示：「太耐嘞，我好似係清朝、古代嗰啲港姐(2000年參選)，太多年嘞，我已經冇咗嗰種感覺，初選嘅時候，我攞咗個『網上最奪目小姐』獎，到後來雖然冇入三甲，但係三甲要做嘅活動，植樹、鏟泥、社會服務我全部要去做，嗰年嘅周末其實都幾忙。」
林淑敏又指自己最初冇簽藝員合約：「我覺得我讀嘅係電影，都想試吓做幕後嘅經驗，就去咗製作公司做幕後，拍旅遊、政治特輯，做咗差唔多年半，開始慢慢式微，嗰時有個機會簽番畀TVB，02年10月就簽番畀TVB。」
讚公司有人情味
問林淑敏演出近年先有人留意，期間有冇諗過放棄？經濟上係咪OK？佢答：「我就好現實嘅，我覺得打份工囉，工作唔一定順利㗎嘛，當中有好多角色我好鍾意，但我鍾意又唔代表觀眾會好認同，但我其實攞到個滿足感，當然十幾年裡面，梗係有捱過、行過一啲困難嘅路，有試過收入唔夠，係會驚、會徬徨嘅，有段時間我自己都諗不如算啦、唔做嘞，都有試吓做其他嘢嘅，但係六年前有個病，呢間公司好好、好有人情味，同我講不如簽番入嚟做啲簡單啲、輕鬆啲嘅工作，如果真係覺得辛苦，咪停咗佢、繼續休息，我覺得又試吓啦！」
林淑敏感慨表示：「我喺病之前同之後嘅心態好唔同，病之前嘅心態係覺得個人磨到係打份工啦、出份糧啦，但6年前因為個大病學識珍惜，珍惜自己嘅工作，珍惜自己嘅生命，想每一樣嘢都做好佢。開始重新去pick up，pick up自己嘅諗法、態度，pick up自己做戲，我係演員，我需要pick up我演戲嘅技巧，一路再做上去。」
賤人、妓女都要做
講到病完之後演技去到另一個層次，林淑敏表示：「其實我做戲唔好，只不過我好彩，遇到個角色係自己理解到。演員好被動，角色嚟到就要做，賤人、妓女、八婆都要做。但要喺入面加入自己嘅嘢。今次大小姐呢個角色好有character，好立體好有人性，呢個角色邊個做，效果都唔會太差，我真係好彩！」
網民戥林淑敏失落「女配」唔抵，插爆得獎嘅朱晨麗，林淑敏就話：「唔止一個人同我講佢做得好好，觀眾對演員係情感上，但行內人係睇技巧。觀眾錫我，我知。我喺無綫十七年，佢哋睇住我大，甚至對我病嘅經歷有同情分。但我冇覺得唔抵，我依家要求好低，淨係想身體健康，繼續有得撈！」
