洪卓立

同湯怡拍拖12年 洪卓立:係福氣嚟!

藝人專訪

廣告

入行不久就跟同公司藝人湯怡撻著,一起走進第十二個年頭,洪卓立說:「係福氣嚟!」

撰文:東方新地|圖片:新傳媒圖片、洪卓立FBYouTube

洪卓立 唱歌定賣樓?

畢業後入行前,洪卓立做過幾個月經紀仔,站在粉嶺街頭拉客的日子雖然不長,不過真的開過單收過佣。在樂壇浮沉了這十幾年,洪卓立說可能做經紀,早就像當年的老闆一樣,有十幾層樓收緊租。

「依家有冇錢上車做業主……老實講,係冇嘅。有排都未。不過溫飽唔使愁,起碼好過幾年前清晒袋零收入,阿爸日日催我轉行,所以我依家每個月出糧會講個數畀爸爸聽,圖佢安心,畀佢知我養得起自己。個問題係,行行都艱辛,31歲仔,點解唔趁後生,揀樣鍾意嘅嚟做?」

曾發展七年地下情

入行不久就跟同公司藝人湯怡撻著,地下情發展足足七年,才因為女友被抨擊而站出來公開:「出邊個個話佢貪錢嫌我窮、執包袱走人,我頂唔順一個二個覺得比我更了解佢至會出聲,當時連老闆 (楊受成) 都話我夠薑!」

一起走進第十二個年頭,洪卓立說和湯怡太像太合拍:「係福氣嚟,一早可以遇到呢個人。」

新歌為甚麼叫〈獻醜〉?是因為出軌偷跳不是男人專利,碰巧洪卓立和監製兼作詞徐浩身邊都遇到案例,當男生遇到另一半變心,原來拉拉扯扯捨不得放手,還不如女生決絕:「我個朋友仲絕,派晒帖,臨門一腳,結果個女仔有咗其他人,婚都結唔成……好多人見到我個樣,睇死係啞忍嗰個,其實唔係,通常打交係我撩交打、嗌交係我出聲嘈先,女人有直覺,男人唔多唔少都有。我唔係嗰啲隻眼開隻眼閉嘅人,無論工作定做人都係,見到問題一定會出聲、一定要解決。攤牌唔代表我要走,唔代表我唔會忍,要視乎有幾愛對方。」

幾愛嚟講,一出道就戀上同公司同期新人湯怡,十二年來,不管是被前呼後擁的時候、插喉躺在病床的時候、停工窮到燶的時候,都有她在身邊陪伴分擔,專一如洪卓立,有幾愛,你話呢?

當年畢業後未有目標,洪卓立做過幾個月區內地產經紀:「如果賣樓而唔係唱歌,我唔排除可能搵得多過依家好多!」

洪卓立新歌〈獻醜〉上線不到一個月點擊已經逼近50萬,說的是愛情名存實亡,留住女朋友的人卻留不住心的故事。

下月11日將與吳浩康在旺角麥花臣舉行演唱會《他說他的故事》,是入行十二年以來洪卓立第一個賣飛演唱會。