娶女友變動力 黃嘉樂：我依家好想紅
撰文：東方新地｜圖片：新傳媒圖片庫、黃嘉樂IG
黃嘉樂 曾考入海關
入行17年，問到黃嘉樂經濟上有無捱過？屋企人有無支持佢、擔心佢？黃嘉樂回應：「好坦白講，我係出身於小康到唔小康嘅屋企，爹哋媽咪係無可能支持到我，只不過我自己比較鍾意投資，幫補到生活，但係就儲唔到錢，爹哋媽咪其實無咩大嘅壓力畀過我，尤其係我爸爸，我爸爸一路都好放任我，可能覺得我係大仔，做每一個決定都諗過度過，佢可能想反對我入呢行，但無講出口，因為佢之前反對過我做一份全世界都覺得好安全嘅工作、一份唔錯嘅工作，因為我畢業之後去咗考海關，考到，仲要嗰年係97年、好多人失業，但我爸爸發晒脾氣、反對得好緊要，我接受咗佢呢個意見。我本身讀電腦，都唔太擔心搵唔到工作，之後就入咗電訊業，一路做一路讀同電腦有關嘅嘢，諗住再銜接去英國讀大學，循呢個方向發展，從來同演藝無關，因為喺正式入行前，兼職做model段時間，我已經知道，如果全職做呢行，紅咪好、唔紅其實生活都無乜保障，不過好難講，好多嘢冥冥中有安排。」
埋怨自己廢
黃嘉樂又講到佢2015年拍完《張保仔》斷咗十字韌帶，停咗年幾冇嘢做：「簽大公司就有呢個好處，變咗我白𢭃人工休養，但無嘢做個人心情係唔好，我唔係十八、廿二，無咁多時間可以嘥，同埋我返嚟係想搏殺，會覺得好嘥自己時間。爸爸嗰時身體又再差咗，會覺得做咩咁黑仔，所有嘢堆埋一齊。」
黃嘉樂續說：「當時爸爸患病，我要做番一個大仔應該要做嘅嘢，嚴格嚟講，我覺得我以前有少少不負責任，依家要負番起責任。我偏向積極，覺得認認真真做，唔會有大問題。呢幾年我係笑多咗，有啲嘢都係會執著，但容易開心咗。以前預計到爸爸情況會一路差，因為癌症開支唔細，好想快啲搵多啲錢，點知最後都係靠我爸爸啲朋友幫我，我至解決到，爸爸走嘅時候，我成個人困住咗，不停自責，講得難聽啲，點解自己廢到咁？做咗咁耐都仲係咁！」
黃嘉樂坦言過往胞弟為他擔起不少家庭責任：「爸爸已經走咗(病逝)，媽媽年紀都大，將近70歲，都要好好照顧佢，依家會對自己工作緊張好多。」
戥江嘉敏慘
而講到緋聞對象江嘉敏，黃嘉樂就話：「我對愛情比較執著，我為咗追一個女仔，可以追到去英國，我係鍾意拍長拖嘅人，第一，緋聞唔係真，第二，我覺得江嘉敏都幾慘，我覺得佢係一個未識修飾自己、仲保持好樂天嘅一個女仔，我覺得佢OK、有天份嘅，我都問佢：『係咪得罪人，做咩個個都咁寫你？你改一改你咁雀躍嘅性格啦！』」
黃嘉樂否認跟江嘉敏的緋聞，更笑指江的爽朗性格致使易被誤會惹緋聞。
對感情專一
對於現任女友Samantha，黃嘉樂就表示：「佢真係改變咗我好多！如果我能力範圍做得到，我都想呢兩年娶咗佢嘅，就算個女仔無要求，作為一個男仔都應該有能力養到佢先，但我自問暫時未有呢個能力，所以我依家好想紅㗎！我依家係有呢個動力。」
問女友有咩吸引到佢？黃嘉樂就甜爆：「佢同我性格幾似，佢係一個專一嘅人，佢比我更加樂觀，同埋佢可以補足到我性格上嘅缺陷，因為我係唔識釋放自己，你睇我斯斯文文，其實我係脾氣好剛烈嘅人，一有睇唔順眼，我裡面如果用溫度計係有一百度，但礙於做呢行，發一次脾氣，就有一個record，就會忍，但久而久之，心理會唔平衡，但原來換個睇法，個人會開懷好多，佢教識咗我呢樣嘢。」
提及早前林子善結婚，黃嘉樂公開同女朋友一齊出席，佢直言：「我覺得需要囉！反正我唔覺得自己會換畫或者做其他嘢，我亦都真係有個想娶佢嘅心態，所以我唔介意呢樣嘢。我問佢帶埋佢出席好唔好，初頭佢以為我介意，我話：『無問題，仲好啦，全世界都知我哋拍拖，仲唔使煩咁多嘢，可以解決咗好多嘢。」
女友Samantha為婚禮攝影師，問到女友有否為他操刀留影，黃嘉樂笑言：「試燈嗰陣有做吓佢model囉！」
黃嘉樂 跟得女友放閃不停
由「御用細佬」捱到今時今日足足經歷17年，黃嘉樂才總算捱出頭來，角色漸漸吃香又成功埋到金牌監製班做到梁材遠愛將，既然得來不易，上位中收埋正印低調處理感情是常識吧！不過男方低調、女友就唱反調，早前每日一po，連朋友都頂唔順形容Samantha為「長期閃光彈」。
宣示主權
據知情人士透露，正印要宣示主權原來係為江嘉敏所逼：「其實佢哋早排5月2日至啱啱拍拖一周年，嘉樂雖然話過想儲兩年錢先結婚，但係變數可以好大，兩年後身邊係邊個邊有得保證。Samantha同嘉樂年紀差唔多、唔想再浪費時間，同埋真係覺得男友好仔唔想錯過。」
不用外出工作時Samantha亦樂得跟實男友做跟班攝影師、出席所有男友朋友聚會，前排與黃嘉樂孖住出席林子善婚宴。
知情人士續說：「本來Samantha對男友好有信心，都冇諗過要搞咁多嘢，不過江嘉敏咁進取惟有見招拆招，除咗返電視台，男朋友去到邊、見咩娛樂圈朋友Samantha都跟到實，次次仲要打埋卡晒恩愛，又成日旁敲側擊叫嘉樂快啲求婚畀啲表示，都係為咗全世界都知佢係嘉樂嫂、希望有人知難而退啫！」
三十多歲Samantha雖然唔夠23歲江嘉敏嫩口，但身形健美又有主見，經常自晒bikini，身材不比電視台小花差。
與黃嘉樂年紀相若的 Samantha是資深婚禮攝影師，不時還親自上陣做model，氣場十足身材亦有睇頭。
有十年婚禮攝影經驗的Samantha在攝影圈薄有名氣，又因為同圈中人熟絡與黃嘉樂不乏話題，去年黃嘉樂老友張頴康帶埋老婆囡囡拍大肚照，亦是Samantha操刀！
