黎耀祥嘆做一線唔容易：係好奇怪嘅緣份
撰文：東方新地｜圖片：新傳媒圖片庫、黎耀祥IG
黎耀祥 從來唔改對白
講到以黎耀祥今時今日嘅地位，要改句對白，大家都會尊重佢，但以佢嘅性格，係咪對白係點都會照講？黎耀祥直言：「係呀，我唔鍾意改人嘢，因為我好尊重大家嘅創作，除非去到現場係好唔合理或者環境做唔到，同埋唔係好合理而冇乜作用我會改。我好尊重大家嘅創作空間同自由。同埋編、導、演係獨立評估，做自己嘅範疇。演員係應該融合編、導，變為一個新嘅嘢，譬如見到對白話『我唔會咁講嘢』而講番自己想講嘅，咁你咪永遠都係做自己。」
笑談《高倫布》：都唔係好差！
對於網民成日彈《神探高倫布》，黎耀祥笑言：「《高倫布》內容都唔係好差！」問係咪個制度編排畀佢，想推都冇得推？佢答：「制度係一個問題，TVB好難去預計，搵我拍、我應承嘅時候係乜都冇，得個大綱，冇劇本，我就好少推嘅，其實咩都唔知推乜鬼啫！《神探高倫布》有個問題，係錯在喺個宣傳度，當年節目巡禮，《神探高倫布》係包裝到好似《神探李奇》咁嘅奇案式，有個養佢、好長氣嘅奶媽司棋姐、遇到舞小姐楊怡有一段情，成件事好有趣味⋯⋯點知出嚟完全係兩回事，沉重到不得了，個主角個腦中咗子彈，性格變晒，鍾意個女人，個女人殺咗個前夫，搞到咁heavy，最慘連宣傳片都拍到《神探李奇》咁，傻豹嘅音樂，完全都唔係嗰樣嘢，觀眾諗住開開心心，點知一睇咁悶嘅？個落差太大，所以拍一個戲出嚟嘅成績，真係冇得怨，根本冇得計。我從來都唔會揀戲，不過近年我開始覺得應該要嘅，所以我贊成某啲演員 話揀戲，盡量揀一啲有趣味，因為我哋演得耐，角色好容易重複，當然重複可以應付自如嘅，因為做過吖嘛，譬如《逆緣》，小人物我做好多啦，對我嚟講唔係好大挑戰、冇難度㗎，嚟緊我都會揀番比較有難度，因為演咗咁多年，自己都想挑戰或者嘗試某啲嘢。」
與梁朝偉、劉德華同期：邊夠佢哋靚仔？
黃秋生話過TVB有好多好嘅演員，譬如韋家雄，但無機會上一線，黎耀祥亦認同：「TVB好演員好多，但做一線，好難嘅！一個演員能唔能夠畀公司接受、觀眾接受，其實有好多因素，做一線唔係容易，亦都唔係一個咩成就，做到一線，但做得唔好或者觀眾唔鍾意成績唔得，一樣冇得做！唔係公司皇恩浩蕩，每人做一次一線試試啦，咁唔得㗎嘛，公司都係 做生意，變咗佢哋總有個選擇嘅，呢個選擇我覺得係基於佢哋嘅經驗、甚至乎唔係好客觀嘅統計，佢哋對觀眾嘅了解、認識。」
「《巾幗梟雄》我有機會做一線都係好奇怪嘅緣份，我入行嘅時候，係梁朝偉、劉德華同期，邊夠佢哋靚仔啫？點會覺得有機會畀你啫？我入行嘅時候都無諗過做一線，我覺得我做戲開心、滿足、搵到食，呢個係做演員最基本滿足嘅條件。我反而覺得畀唔畀一線或者重啲嘅角色唔係重點，反而係公司應該著重去珍惜一班演員嘅資源，喺人工、各方面嘅尊重，一個戲除咗一 線，仲有二、三、四、五、六線都要好睇，嗰個戲先好睇嘅。唔係做一線就好巴閉，二、三、四、五線好多都係受人尊重嘅演員。」
新聞對演員影響大
問佢認為觀眾緣係講運定可以苦心經營？黎耀祥表示：「兩樣都要㗎，運係一個問題啦，尤其是香港嘅觀眾好得意，香港嘅觀眾好講感情、要儲嘅，你就算幾靚仔出嚟，佢唔一定要第一時間鍾意你，要睇多你幾部戲，甚至乎要認識埋你個人，先至得㗎喎！呢個係好奇怪嘅項目嚟，如果你個人衰，慘嘞，所以除咗戲好，你個人要好，所以好多新聞對好多演員嘅影響好大，啲觀眾唔知信晒，當然都有啲真嘅！哈，哈！觀眾緣第一要有相當條件，唔好乞人憎先，街市檔口呢個客好傾啲，當然你日日嚟幫襯又好傾啲，觀眾一樣，我成日睇住你，愈睇愈順眼，呢樣嘢係累積番嚟，我就係好明顯嘅例子，你問我係咪演柴九先演得好？唔係呀，我之前都演得好㗎，哈，呢個唔怕自己講，柴九嘅成功因為累積咗好多嘢，累積咗觀眾對你嘅認識，甚至乎同情，覺得你做得咁好點解唔得呀？好多嘢加埋，所以觀眾緣呢樣嘢我哋無辦法控制，我哋只能夠做好自己嗰一部分。就係第一，唔好太樣衰，哈哈哈，第二，做一個好人，好人係包括你自己日常生活、個人嘅修養，對觀眾、公司、劇組，你唔好以為你鬧一個人無事，呢個人同十個人講，十個會同一千個人講。呢樣係演員嘅修養，唔單止係為你自己嘅事業，你要明白你嘅影響，你鬧完一個 人，係會有一萬個人去鬧番你，呢樣嘢好緊要。」
