金像獎的背後 五個從未奪影帝的男神

今屆「香港電影金像獎」已經圓滿結束,「最佳男主角」由首次獲提名的林家棟憑《樹大招風》奪得,恭喜恭喜!但有人歡喜有人愁,未必個個都可以首次提名就攞獎,有唔少耳熟能詳嘅男演員,你以為佢已經攞過,但原來多年來都未曾捧過金像女神回家,例如普通話好叻的古天樂、歌神張學友等等。

以下五位好戲之人,你又認為邊個最值得打破宿命,攞番次 影帝 ?


1.古天樂-戥腳鐵膽

自從喺《尋秦記》彈起後,古天樂將重心轉移到電影市場,拍過多套膾炙人口的好戲,但就無一套成功攞獎,可以話係「戥腳鐵膽」!多年來,古仔喺所有電影頒獎禮的提名共有17個,可惜全無收獲。而金像獎方面,古仔2009年憑《一個好爸爸》、及2014年憑《掃毒》獲提名過最佳男主角。


其實古仔都可算係近年最多產的香港男演員,每年都幾乎有五部以上的電影上映,真係老是常出現,而且咩類型的角色都做過。希望古仔除咗學好啲普通話外,都要繼續努力拍多啲好戲,打破宿命!


2.張學友-男配角命

歌神張學友,除咗歌唱勁之外,拍戲都有一手,早喺1989年同1990年分別於金像獎同金馬獎都攞過最佳男配角,1989年便憑《旺角卡門》中「烏蠅」一角獲金像獎最佳男配角,為「四大天王」中最早喺金像獎留名嘅人。另外1990年就憑《笑傲江湖》中「歐陽全」一角,獲金馬獎最佳男配角。


可惜學友冇咩影帝命,佢先後憑《暗色天堂》、《月滿軒尼詩》及《金雞2》等電影、六次獲提名金像獎最佳男主角,不過全部落空。學友近幾年都已經唔係經常拍電影,就算拍都唔係經常做男一,唔知佢將來仲有冇機會一嚐影帝滋味呢?


3.吳鎮宇-四次落空

今年憑《脫皮爸爸》提名最佳男主角的吳鎮宇,除咗揸飛機叻之外,亦係公認的好戲之人,多年來已獲四次提名金像獎最佳男主角。可惜鎮宇每一次都鍛羽而歸,未捧走過金像女神。成功上台的一次,係2000年憑《公元2000》奪最佳男配角。


雖然冇喺金像獎封帝,但鎮宇就喺香港電影評論學會大獎拎過三次,以及喺金馬獎拎過一次最佳男主角,演技毋庸置疑,相信佢已經係各位觀眾心目中的影帝!


4.黎明-三次飲恨

「金句王」黎明今年負責頒影帝狀座俾林家棟,其實佢除咗叱咤樂壇,仲曾分別喺1997年、1999年及2003年獲提名金像獎最佳男主角,可惜三次都飲恨而回。反而係金馬獎就有所斬獲,喺2002年憑《三更之回家》中「于輝」獲金馬獎最佳男主角。



5.任賢齊-首次提名


歌影視三棲的小齊任賢齊可謂全能藝人,多年除咗帶俾大家唔少金曲,原來亦拍咗40多部電影!以前有《夏日的麼麼茶》、《嫁個有錢人》等輕鬆小品,到近年《樹大招風》、《奪命金》等嚴肅的角色,期間同過無數影帝影后交手,不過小齊竟然從未喺金像獎有過任何提名。


直至今年,小齊終憑《樹大招風》首次獲提名最佳男主角,雖然最終被同片的林家棟奪得影帝,但能獲提名都係一種好大的肯定,希望小齊再接再厲!

全文完