麥美恩

麥美恩奪「飛躍進步女藝員」竹昇妹打拼七年之路

《萬千星輝頒獎禮2017》昨晚結束,雖然唔少賽果都惹來非議,但麥美恩 (Mayanne)攞「飛躍進步女藝員」就大家齊齊拍晒手!傻大姐形象深入民心的Mayanne早年選港姐後加入無綫,一步步踏上主持及司儀之路,近年人氣急升,打拼七年終成為「飛躍進步女藝員」,Mayanne亦係第一位以擔任司儀及主持而贏得呢個獎的女藝員!再次恭喜Mayanne!

「飛躍進步女藝員」麥美恩

日前《萬千星輝頒獎禮2017》中,唔少獎項賽果都被網民炮轟,唯獨有一位得獎者係公認的實至名歸,就係「飛躍進步女藝員」麥美恩 (Mayanne)!Mayanne在台下得知獲獎後喜極而泣,上到台都繼續喊,佢感慨表示:「我知我有好多缺點,但係上帝俾咗個好好嘅恩賜我,可以令觀眾笑!」



中文好全賴公公

另外麥美恩提到好多人問佢呢個竹昇妹點解中文咁好,原來係Mayanne公公以前日日陪佢做中文功課、幫佢默書,而Mayanne今日亦可以自豪咁對公公講,佢有做功課,喺香港發展得好好!


麥美恩 傻大姐形象入屋

出生於加拿大的麥美恩現年30歲,下個月就31歲生日,佢在卑詩省華人重鎮列治文(Richmond)成長,並於名校英屬哥倫比亞大學主修化學。Mayanne參選港姐後加入無綫,不時展露其麻甩又開朗的個性,開創了自己獨特的定位,深得觀眾喜愛!


其實都係個靚女吖!

麥美恩雖然唔算係好典型嗰種美女臉孔,身材又唔係咩「咪神」級數,但相信無人會否定佢其實都係個靚女,眼大大、笑容親切又甜美,酒窩又迷人!平時Mayanne多數係簡約打扮,唔走淑女路線,不過每逢出席大型活動都會盛裝打扮一番,又係另一種魅力!



2011年港姐第四名

回到那些年,麥美恩回流香港後參加2011年的香港小姐競選,最終奪得第四名。當年冠軍係出爐最「最佳女配角」朱晨麗,亞軍朱希敏、季軍許亦妮。


那些年「龍躉村姑」…

想當年麥美恩因為較豐滿的身材,被傳媒封為「龍躉村姑」!依家都幾唔可能見到Mayanne再加著三點式泳衣……



主持《學是學非》上位

至2013年,麥美恩成為綜藝節目《學是學非》的主持之一,雖然知名度不及其他幾位,不過佢在節目中願意放下身段,經常有爆笑演出,真摯不造作的感覺相當親民,「傻大姐」形象深入民心!


新一代綜藝女王

雖然甚少演劇集,不過麥美恩可算係新一代的綜藝女王,參與大量綜藝節目及資訊性節目,頻頻做主持做司儀,曝光率高過唔少花旦小生!



麥美恩在《萬千星輝頒獎典禮2016》中連奪三獎,其有份參與的《我愛香港》、《學是學非》和《天與地》,分別獲得「最佳綜藝節目」、「最佳資訊節目」及「最佳特備節目」,厲害!


廣告界寵兒

形象貼地又入屋,自然成為廣告界寵兒,原來佢去年就已經拍了八個廣告,由牙膏到化妝產品都有份,去到邊都見到佢!



竹昇妹打拼七年之路

麥美恩在加拿大土生土長,隻身來到香港發展,與家人分隔兩地當然好唔捨得。來港七年,Mayanne終於奪得演藝生涯首個重要獎項,相信佢爸爸媽媽都一定為佢感自豪!