Wong

父患腦退化 黃又南:一家人坐埋已經好開心

組合Shine徐天佑與黃又南,繼2012年的《Shine Passion Live》跨年騷後,敵逢今年係佢哋出道15年,兩人覺得ready可以再喺紅館開個唱,於是入紙申請6次,終成功取得紅館檔期,Shine將於3月2及3日再踏紅館舉行第二次《Shine Moments Live 2018》演唱會。其實又南入行以來經歷過不少高低起跌,試過因為幫父親還錢,每個月得二千零蚊使,又試過搏命拍動作片,拍到周身傷,現在終於還完錢,但父親又患上腦退化,不過黃又南好樂觀,佢話:「經歷過咁多嘢之後,我發覺一家人坐埋一齊,好簡單,已經係好開心嘅事!」

撰文:東方新地

圖片:新傳媒圖片庫

黃又南 堅持為父還債

黃又南話因為要幫爸爸還錢嘅關係,有六年試過每個月得二千零蚊使:「但我又冇嘢,咪坐地鐵開工囉,我開茶餐廳嘅朋友仲話:『嚟食飯,我包晒你三餐!』」佢指嗰段時間最辛苦嘅唔係佢自己:「我嘅壓力只係好表面,屋企人聽嘅閒言閒語可能比我更加多。當中我亦都搵到樣嘢,起碼我有堅持,每個月咁去還,我自己開多條路,就係拍動作片!一路拍,搏命做,拍到周身傷,返到屋企好迷惘,諗我咁做啱唔啱?但你畀我再揀,我都會咁揀。」

黃又南
黃又南指在還債嘅過程中,屋企人要聽好多閒言閒語,比佢壓力更大。
黃又南
雖然經歷過辛苦還債嘅日子,但黃又南話畀佢再揀,佢都會一樣揀堅持落去,每個月咁去還。

黃又南
講到近年搞好多生意,黃又南話好彩冇蝕過:「全部都有賺錢,眼鏡生意已經係第四年,但我頭兩年都冇講過自己係老闆,因為我想產品本身令人想買,唔係因為黃又南,反而我會開心啲!」