黃智賢

黃智賢 同老婆恩愛27年:有共識唔生B

50歲黃智賢入行29年,由在《閃電傳真機》做兒童節目主持人捱起,到今年一連三部劇集《波士早晨》、《翻生武林》同《是咁的,法官閣下》都升呢做男主角,終於捱出頭!

撰文:東方新地



圖片:新傳媒圖片庫、黃智賢微博

黃智賢 兩劇連住播

近日正在熱播嘅無綫劇《波士早晨》中黃智賢飾演陳慧珊前夫,因故空降秘書陳慧珊所任職公司,成為其公司高層,劇集這個星期進入結局篇,兩人嘅感情關係亦開始進入高潮。《波士早晨》大結局後,緊接住開播嘅新古裝劇《翻生武林》亦係由黃智賢拍檔蕭正楠同姜大衛主演,兩劇車輪戰霸佔無綫黃金時段,人氣急升!

黃智賢
《波士早晨》進入結局篇,陳慧珊發現黃智賢當日同佢離婚嘅真相,決定原諒佢。

黃智賢
但陳慧珊同黃智賢和好後,卻發現對方同跟秘書李佳芯感情曖昧,令二人關係再次陷入膠着

與太太拍拖14年 結婚13年

黃智賢同任職OL嘅太太自細認識,之後拍拖14年、結婚13年,黃智賢一直都好保護老婆,太太早年被傳媒追訪時,佢曾經表示:「佢係圈外人,冇心理準備,我老婆好細膽又怕醜,過往好少同佢出席首映同飯局。我作為老公要保護老婆,佢係OL唔想引起太多話題,要搞就搞我!(點𠱁番老婆?)將佢嘅相影得靚啲,唔影都影咗,可以點?」

黃智賢
黃智賢從來唔帶老婆出席公開活動,但唔使開工嘅日子,佢經常都會同老婆孖咇出巡。

黃智賢
黃智賢話自己同老婆自𡃁仔𡃁妹時代已認識,一路見證住對方嘅成長。

有共識唔生B

黃智賢話同老婆結婚三年後已經傾過,諗好咗唔會生BB:「大家都知對方性格唔啱做爸爸媽媽,覺得責任好大,我哋冇呢個耐性,而且香港嘅教育制度或者社會,都令我冇安全感,唔覺得適合有小朋友,當然意外有咗又係另一樣嘢,個天畀你又唔同。我哋決定咗之後都冇再諗小朋友嘅嘢,反而會諗冇小朋友嘅好處,我覺得『無憾』就係唔好反反覆覆去後悔。」

黃智賢
黃智賢同老婆生活簡樸,不時拍住拖去街市買餸,一齊返屋企煮飯仔。

黃智賢
黃智賢買餸時都會精挑細選,睇嚟喺屋企煮開幾味,對食材都好有研究。

養狗代B

黃智賢家中養咗兩隻可愛狗仔,分別係摩天使女Cream Cream同T-cup貴婦女Pepper,依家已經六歲,冇生B計劃嘅黃智賢夫婦都當正佢哋係自己仔女咁錫到燶,不過原來黃智賢當初想養嘅係大狗,會養細狗全因遷就太太:「太太驚大狗,而且細狗易啲打理,就算唔得閒放狗,佢哋都可以自己喺屋企玩。至於揀狗女亦都係太太嘅意思,因為狗女嗲啲,又得意!」

黃智賢
黃智賢話自己同太太都將對仔女嘅愛投放晒喺Cream Cream同Pepper身上。

黃智賢
Man爆嘅黃智賢因為太太嘅關係選擇養細狗,依家已經將兩隻狗女當成寶貝女,錫到燶。

黃智賢
黃智賢話兩隻狗狗性格好唔同,Pepper好黐人,Cream Cream就最緊要食,兩隻狗狗都為佢帶來好多開心嘅回憶。

嘉穎教識打網球

黃智賢熱愛運動,接觸網球已有十年,不時相約鄭嘉穎、郭晉安等波友一齊打網球,佢話:「之前係打羽毛球嘅,但一直好想學打網球,都係識咗嘉穎之後佢教我打,最初我用咗好多打羽毛球嘅習慣打網球, 同埋好唔慣網球飛嚟飛去,估唔到個速度,依家我淨係打網球,鍾意網球夠powerful,減壓發洩好好!打波出一身汗,有傾有講, 同水準接近嘅對手打,來回板數多,好開心!」

黃智賢
黃智賢話自己原本打開羽毛球,係鄭嘉穎教識佢打網球之後,先令佢愛上網球夠powerful。

黃智賢
黃智賢嘅網球偶像係拿度:「鍾意佢夠拼搏,尤其打逆境波後來居上,好有驚喜。」

黃智賢
身為運動型男嘅黃智賢身形fit爆,去旅行都不忘晒肌。

黃智賢
黃智賢試過多次因打網球導致頸及腳背肌肉發炎,依然無損佢對網球嘅熱愛:「每次都想快啲好番,好番就可以再打過!」

黃智賢


第一代《閃電傳真機》主持

黃智賢初出道係兒童節目《閃電傳真機》嘅第一代主持,當年同佢同期嘅主持除咗有譚玉瑛姐姐,仲有「麥包」麥長青同黎芷珊,依家四人都有不同成就,各自捱出頭。

黃智賢

黃智賢


《真情》彈起

黃智賢自1995年開始演出長壽處境劇《真情》「阿海」一角,與張慧儀飾演嘅兩個角色「彩瑤」同「阿貴」都有感情線,開始為觀眾所熟悉。

黃智賢

黃智賢


黃智賢

《翻生武林》演狡詐東廠

新劇《翻生武林》中黃智賢飾演東廠仇不群,將參加新晉英雄大賽嘅玉雲龍(蕭正楠飾)收入監牢,嬌鳳(簡慕華飾)救弟心切,暗中放風指客棧有隱世寶物,不群不單立即釋放雲龍,更派出左右手仇在心(陳凱琳飾)跟隨玉雲龍到客棧收取情報,此事亦引來各路隱世英雄一一湧現,各施奇謀,期間令一直尋找殺害雙親嘅仇在心發現真相,倒戈相向對付仇不群,更與玉雲龍產生感情,決心一同改革武林,令本已奄奄一息的武林再現生氣,但二人卻陷入本是慈悲老人嘅任我飛(姜大衞飾)籌謀已久嘅復仇大計中⋯⋯

黃智賢
《翻生武林》由蕭正楠、黃智賢、姜大衛三大男主角孭飛。

黃智賢
黃智賢主演嘅《波士早晨》剛大結局,緊接住就到《翻生武林》上演,劇接劇不停上。

《是咁的,法官閣下》連媾兩女神

另一套新劇《是咁的,法官閣下》亦係由黃智賢擔正主演,佢繼《四個女仔三個BAR》後再做大狀,現實「桄榔樹一條心」嘅佢劇中同王君馨、麥明詩兩大女神都有感情線,認真好艷福。

黃智賢
黃智賢同關禮傑在《是咁的,法官閣下》同樣飾演大律師,關係亦敵亦友,而王君馨則與黃智賢飾演離婚夫妻,與關禮傑亦糾纏不清。

黃智賢

關鍵詞
黃智賢