江若琳

江若琳剖白事業高低潮:走光好小事

江若琳與蕭潤邦由十年朋友變戀人,並將於年尾結婚,兩人在事業上都經歷過各種高低起跌,在訪問中他們就互相分享自己如何過渡事業低潮。

撰文:東方新地|圖片:新傳媒圖片庫、江若琳IG

江若琳 由細到大似白紙

30歲江若琳入行近11年,問佢覺得自己發展點?佢話:「我覺得OK,幾滿意,可能大家眼中覺得好坎坷,成日都起起跌跌,但我又覺得都算幾好,同埋我覺得個天要我經歷咁多嘢,可能係因為我由細到大太似一張白紙,唔知呢個世途係點,如果唔係我呢十年間遇到咁多嘢,我唔會咁快去成 長、咁知足。我依家係好知足、好隨遇而安,如果我嘅路一路順暢,我可能有更好嘅發展,但我唔會開心,因為唔係我覺得好快樂嘅生活模式。」

江若琳
江若琳直言星座是天秤座,追求公平,對不平事特別看不過眼。

講到同前經理人公司嘅合約官司,江若琳表示:「仲未了結,都keep住處理緊。因為我係處於被告嘅狀態,我係好被動嘅一方,互交緊啲文件,你都知司法程序好漫長。都使咗幾多錢嘅,無辦法啦,佢要嚟嘅,仲可以頂咪繼續頂落去,依家我仲可以有呢個魄力去頂得住,可能佢成為我嘅動力㖭,要處理呢件事,咪努力啲做嘢。」蕭潤邦補充:「但冇影響佢繼續行嘅路或者我哋要結婚、生仔。」江若琳續說:「工作一路都好正常,好多謝客戶朋友一路畀好多工作機會我,可以繼續做我鍾意做嘅嘢。」