許家傑

捱足9年 「送水輝」成功入屋 許家傑:窮到無嘢好輸…

選港男出身、入行九年,多被派演無名路人、配角,自去年底才憑處境劇《愛·回家之開心速遞》「送水輝」一角成功入屋的許家傑(Jack),大談由平淡文職生涯,一躍成藝人,至終為觀眾認識,當中如何扭轉事業低潮及期間經歷的心理變化等。

撰文:東方新地|圖片:新傳媒圖片、許家傑IG

許家傑 選港男為過癮

首先提番許家傑喺09年選香港先生得冠軍,嗰屆好多人淨係記得佢同吳雲甫(Owen),點解外間話佢係黑馬?許家傑笑言:「因為比我大隻嘅有好多,我唔係特別sharp,只不過係高,但唔算大隻,好似Owen(吳雲甫)大隻好多,好有陽光、model嘅感覺。」參選時覺唔覺得自己係黑馬?「完全唔覺,完全無諗過贏定輸,但我好enjoy個過程。睇得出有啲人係好想入行而去選,但我係為咗過癮、好玩,由細到大,我都係鍾意玩嘅人,打機鍾意打爆機為止,玩一樣嘢要玩到盡,選香港先生我當係我人生一個遊戲,應該玩盡佢。」