黃子華

群星撐反口 黃子華 封咪留後路

2018年度紅館盛事,唔使講,一定係黃子華封咪前最後一擊、《金盆𠺘口》棟篤笑。

由年初流出開騷消息,子華迷撲飛撲飛再撲飛,終於輪到自己入場睇子華神,話咁快7月31日來到最後一場,紅館內座無虛席、高朋滿座都係為見證子華神「收口」 一刻。

壞消息係話到明最後一次的26場《金盆𠺘口》都畫上句號,好消息係子華神當場預告有機會反口,連老友古巨基都開po撐佢金盆反口,搵食大晒,又有群星齊齊撐,子華反口不是夢!

撰文:東方新地|圖片:新傳媒圖片庫、黃子華FB

黃子華 最後棟篤只限今年

可能係全行keep得最好60後藝人,目測咪最多四張,其實子華60年出世、下個月就滿58歲,所以一口氣棟足26場,尾場子華明顯特別感觸,喊完又喊,又回憶番當年第一次開棟篤笑十三個原因,原來當年因為朋友得了腎病、失眠、想做一個不是喜劇的個人表演、收工後唔想番屋企,最後一點係「因為我就快30歲了!」如今60歲都嚟緊,點解要封咪:「好多人對我封咪有好多揣測,其實因為我成日唔記得嘢,好容易畀觀眾打斷,我好難頂得順演出時有咁多嘢插入嚟。」