沙律

嫌寫真唔夠激 直擊沙律沖身大解放

夏天為大地帶來美少女寫真集,一年一度書展告終啫,好彩暑假仲未完,去沙灘行番轉,隨時見到實體少女曬日光、6D寫真擺在面前任睇唔嬲!

日前,女神沙律 (張沛樂) 就撇甩男友林耀聲去到淺水灣曬番一身健康膚色又補充吓維他命D。今年同趙詠瑤合體推出寫真《閨蜜遊記》人氣工作量都急升,沙律話做好準備出年書展再嚟過:「男朋友都支持我,下一本會自己一個人影,唔使就住就住可以再激啲!」

撰文:東方新地|圖片:新傳媒圖片庫、沙律IG

沙律 玩角色扮演

同上位男星林耀聲拍拖兩年、不時晒恩愛,打風都打唔甩咁滯,最難得係男友生活上對沙律呵護備致,不過工作上就從來都支持同尊重女友決定,包括今年書展本《閨蜜遊記》同出年單拖再上陣的寫真大計。感情好啫,又唔使下下糖黐豆全程貼實嘅,日前本刊就發現沙律一個人、帶住一條毛巾一張蓆,薄施脂粉去到淺水灣曬足半日太陽。

沙律
E級女神沙律出完寫真原來仲未晒夠身材,日前一個人比堅尼上陣,去到淺水灣沙灘曬足半日太陽。

「一個人可以放啲!」

本刊致電沙律,原來男友天生黑底唔敢再曬、自己就寫真集後工作量暴增搞到休息不足精神欠佳,所以一有空嗱嗱聲補充吓維他命D喎:「寫真印咗2,000本,書展已經賣咗1,600本,剩番喺書局賣都就嚟斷貨,好滿意呢個結果。其實拍完呢本,我都已經同公司傾緊想搵唔同團隊合作出年再影,到時就會係自己一個人影,唔使就住就住、多啲自由度,可以再放啲。尺度方面,都係三點式,不過主題我覺得可以玩好多嘢,最想就係制服、cosplay、唔同角色乜都試吓,滿足吓自己又可以畀人哋見到我可塑性好高,搵我做唔同角色。我做啲咩,男朋友都好支持從來唔會唱反調。雖然佢份人唔出聲,成個話題終結者咁,但有時見到佢拍戲會不知不覺演繹咗我哋生活小細節,我覺得大家一直互相影響,真係好幸福!」騷完半球大解放完再順手放吓閃,日光加埋閃光彈襲擊,好曬呀!