楊明

試過十八個月無糧出 楊明:多謝睇唔起我嘅人!

楊明入行近20年,一度因負面新聞阻慢發展,近年一步步由無名字的閒角做起,幾經轉折,再受無綫力捧,重上一線,在訪問中,楊明就大談期間受到的冷言冷語及經濟壓力。

撰文:東方新地|圖片:新傳媒圖片庫、楊明IG

楊明 重讀訓練班

首先講到楊明當年經由模特兒入行,問佢最初點解選擇入呢行?佢話:「嗰時好興,行行吓街,真係有星探搭膊頭問:『得唔得閒上嚟影吓相?』上佢公司影幾張相做profile,跟住就幫我接job。」細個理想係做咩?「好多嘢做,嗰排電視播警察,我就鍾意做警察,播消防員,我就想做消防員,我最想係做消防員,我去考過,但我散光太深唔得,中三嗰年暑假,睇日劇見人做壽司師傅,我又好鍾意,去咗間日本餐廳應徵做壽司師傅,請咗我做樓面,到中五,諗住做長工,學整壽司,點知又叫我學做和食鐵板燒,熱到我,做咗幾個月就入咗訓練班。」