車婉婉:「無屋企射住唔好入行！」 大爆自己入行後辛苦經歷
新秀出身的車婉婉，今次會大講由唱歌誤打誤撞拍劇拍戲行出了另一條娛圈路 ，又剖白由滿天神佛的神婆到信基督教，及分享高齡產子為人母的喜樂！
撰文：東方新地｜圖片：東方新地、車婉婉ig
車婉婉大爆自己入行後辛苦經歷
自稱讀書不算太叻的車婉婉中學讀銅鑼灣聖保祿，她指該校是一間剛柔並重的學校，讀書不會太死板。然而，車婉婉回想當時讀書：「因為我代表學校去過唔同嘅男校唱歌，咪識好多鄰校嘅男孩子，已經開始咗賣唱生涯。」，就自踏上歌唱之路。
於香港完成中學學業，她到美國讀大學，放暑假時回港參加新秀。她就：「我嗰屆陳欣健做總經理，佢保證一年內會出碟，嗰時仲簽咗 TVB 經理人約，好開心，咁細個十零歲去澳門唱個騷有咁多錢，有啲憧憬，我哀求媽咪畀我暫停讀大學，留喺香港等出唱片。」，果然一年之後就出碟。
當問到不少新秀已經不見了，她笑言自己是其中一個：「出碟後無乜嘢做，跟住TVB叫我去上海做東亞運動會主持，我完全都唔識運動，咪照做。」，有工作總好過無。
車婉婉拍第一套劇是郭富城有份的《 烈火狂奔 》，她稱：「跟住我覺得無乜嘢做，就走咗，返去讀書，因為咁樣喺度 hea都好嘥時間，後尾另一間公司(環球唱片)搵我造歌，嗰時我就嚟畢業，又返咗嚟。」，來來回回又回到香港。
車婉婉於訪問中強調了一點，她稱：「無屋企經濟上射住，唔好入行㖭，你見到淨係浮上面嗰啲藝人，跌晒落街嗰啲你都見唔到！」，道出了這個圈其中一個重點。
星運未如當初所想，車婉婉亦未有放棄：「陳嘉上導演突然搵我拍《野獸刑警》，拍電影，好勁喎，同黃秋生拍喎，嗰時我好長頭髮，剪咗個冬菇頭，三年無男仔追我，拍完，提名女配角，開咗條拍電影嘅路，又延續咗幾年。」，人生太多事以料不及。
喪母悲痛失聲
車婉婉提到：「我媽媽過身之後，我估係處理唔到情感，聲帶無咗聲，唱唔到歌，嗰時我去咗做電台，仲要一個禮拜做七日不停講嘢，咁把聲係唔會好番㗎嘛，當時係好無助。」，過度傷心引致失聲。
相信不少人都有聽過歌曲〈 會過去的〉，大概是車婉婉歌唱事業上一個標誌，因此歌帶結她名和利。而婉婉則稱：「當日係許志安同我講 :「不如我同你唱隻歌啦!』，之後就打畀陳輝陽，叫佢幫我寫隻歌。」。
續說：「3日後佢畀咗隻Demo我，好快錄完，我都唔知隻歌算好定唔好，隻歌好慢熱，開頭啲DJ都唔係好鍾意，跟住無端端橫掃晒啲頒獎禮，我覺得都算有交代，無辜負安仔嘅心機。」。
提到點解會找她於新劇《是咁的，法官閣下》做法官，她笑言：「編審睇過我一套戲，覺得個感覺好啱，搵監製搵我。嗰時我啱啱生完兒子BBQ幾個月，見監製都要帶埋個仔去，佢哋同我講覺得好啱我做，好啦、試吓啦，就接咗。」，一試又無妨。
預告變基督徒
由於當時車婉婉身邊有幾個朋友都是基督徒，她指：「 鄭秀文、 孫耀威全部話 :『 你有日一定變基督徒!』。我記得有日我打高爾夫球，唔見咗包煙，我沿路都搵唔到，打完波即刻再買包煙，有日起身超頭痛，跟住有把聲:『 你食得夠多尼古丁㗎嘞，你唔食煙你以後唔會有呢個頭痛!』」。
「我喊住話:『我唔食嘞，好痛呀!』由嗰日開始，一口煙都無食過。我仲話:『你個神咁勁，搞到我戒煙，我就信嘞!』」，原來如此。
嫁外國人
車婉婉坦言自己無諗過會嫁外國人，「啱啱個timing，戒煙七日，有朋友介紹我依家老公識，覺得幾靚仔、OK 喎，好似有少少chemistry。」，緣份就是無法想像。
3年尾，車婉婉與拍拖三年的澳洲籍男友 Jonathon結 婚，17年以42歲高齡誕下兒子Justus(BBQ)。丈夫為游泳好手兼教練，「個仔幾個月掉落泳池啦，所以沖涼花灑照頭淋佢都唔會喊。」，好犀利！
車婉婉認為自己是個嚴厲的媽媽，笑言：「我要有規矩，我媽媽其實好嚴，我十幾歲嗰時，放學最遲六點鐘返屋企，我未去過人哋屋企瞓，又未去過露營宿營，我阿媽係:『女仔做咩去人屋企瞓?你無屋企咩?』」，相信總有父母會擔心子女，才會這麼嚴厲。
「我覺得細路仔一定要有規矩，所以我個仔好醒，佢歲半，想睇電視或者做啲咩就會去搵爸爸，佢從來都唔會扭我，因為知我唔會睬佢。」，認真有趣！
問到會否生多個BB，婉婉笑謂：「高齡，好杰!再整多件就真係好高齡！」，至於好生完都依然這樣瘦，她則大爆是因為餵人奶，揚言：「餵人奶係最快瘦！」，大家可能可作參考。
車婉婉 湊仔辛苦過拍劇！
最近時不時都會喺大台劇《是咁的，法官閣下》入面見到車婉婉，劇中飾演法官，成日都要黑起塊面，螢幕之下，車婉婉就係一個溫柔嘅好媽媽！日前佢PO咗幾張同BBQ去公園玩嘅相上ig，歲半大嘅BBQ，依舊斤両十足，着住件白色小背心，仲甚有「麻甩feel」！
BBQ咁活躍，又大隻，明顯係個健康嘅小朋友，追趕跑跳兩個鐘都冇停過，難怪車婉婉會猛話辛苦！「高齡日誌之你放電所以我冇電，週日，BBQ先生08起床，梳洗過後吃過早飯都是0930⋯ 吃貨BBQ強烈表示他已經入滿油，完全需要馬上放電 一到Playground，BBQ尤如電兔，不停跑、爬、跳⋯歷時兩個多小時，我就追住佢兩個多小，佢同我都全身濕透，怕佢吸番啲汗入去會唔舒服，即刻返去同佢一齊沖涼⋯ 沖完涼，都係1200，先至過咗半日，晏都未食，Q MaMa已經感到十分疲累，仲有大半日呀⋯ 有冇放電助理介紹？包保可以減肥！」
自己骨肉當然唔會介意為佢付出啦！尤其是對車婉婉嚟講，呢個仔亦係得來不易！首先入行之後有算命師傅批佢呢世都結唔到婚、生唔到仔！但係最終車婉婉41歲就自然懷孕，仲以42歲嘅高齡，生咗BBQ呢個健康巨B！
而家婉婉有份參演嘅劇集《是咁的，法官閣下》剛剛開播，原來喺BBQ 5個月嗰陣，婉婉先抱住個仔去見監製，而且仲喺監製間房換片。
第一次做法官嘅角色，仲要邊餵奶邊拍劇，對於一個母乳媽媽嚟講都真係幾辛苦！對白長都唔係問題，最慘係餵奶令專注能力下降，而做法官講嘢又唔錯得，所以真係好大挑戰！
車婉婉囝囝瞳孔似混血嗲哋？
出緊牙仔嘅BBQ眼仔碌碌，識醒目望鏡頭影相之餘，仲見到B仔對眼可能遺傳咗嗲哋混血兒嘅瞳孔，睇落灰灰綠綠咁，加埋個髮型，幾靚仔！
原來BBQ已經有25磅重，而媽咪車婉婉就表示自己條腰頂唔住，而家接受緊治療，仲呼籲咁多位媽咪要注意抱BB嘅姿勢，相信車婉婉可能係抱B姿勢唔正確，而整親條腰。睇嚟車婉婉自己以後都要小心啲呀！
車婉婉自嘲高齡
上年車婉婉42歲，但仍無懼屬於高齡產婦誕下BBQ，所以佢而家不時都會以「高齡日誌」做主題，喺個人社交網分享育兒經驗或BBQ近況。之前，佢就大讚BBQ個生理時鐘非常穩定，每晚大概8點幾就訓教，朝早大概7點就會起身，照咁睇BBQ都應該幾好湊。
夏日炎炎，嗲哋媽咪就緊係要同BBQ一齊落下水，消消暑。
之前，車婉婉就話BBQ爬上張櫈嘅時候，連人帶櫈倒地，而BBQ嘅食指內側更被夾傷出血，不過好彩最後平安冇事！
上年3月28號，選擇自然分娩嘅車婉婉為混血老公誕下BBQ，重8磅9安士，正式做人媽咪。
