楊思琦

母慈女孝 楊思琦 三代同堂開心行街

身為將軍澳街坊對楊思琦、思琦媽同思琦女Krystal一定唔陌生,區內食店、超市同小朋友學習中心,經常都見到佢哋三代同堂嘅蹤影,只要唔使開工,廿四孝媽媽思琦一定陪住個女,而同樣錫到個女燶嘅思琦媽就一定常伴左右幫吓手。

撰文:東方新地 │ 圖片:新傳媒圖片、楊思琦IG、《Miss Szeki 2018》

楊思琦 三代同堂行街

呢日總算跨區活動,仲見到好少蒲頭嘅思琦爸爸同行。如常又係思琦做司機,一家四口過海嚟到中環行街街,去街前思琦先上商廈寫字樓處理公事,Krystal就由公公婆婆睇實喺樓下等候。雖然搵食養家湊女全靠一己之力,思琦教女絕對100分,媽媽唔喺身邊,Krystal都乖乖一手拖住公公一手拖住婆婆,等足十幾分鐘都完全唔扭計冇唔耐煩。

辦完正經事唔使心掛掛,思琦會合家人開心行街,佢仲走去買杯嘢飲過吓口癮㖭!點解話思琦係廿四孝媽媽?皆因簡單一杯外賣飲品,都買杯不含咖啡因,預咗同寶貝女一齊分享囉!