洪永城

直擊漏夜睇樓 洪永城急箍絕種好女友

無腳雀仔洪永城經歷一年半的自由自在單身生活,終於做回有腳雀仔,上月被爆戀上模特兒兼長跑教練梁諾妍(Inez),踏入2019年洪永城直認戀情,仲孖住去除夕派對狂放閃光彈。

過往媾女無數,就連「最不能錯過的女友」唐詩詠都曾追到手,洪永城全靠把口𠺘過油,不過今次好唔同,與Inez拍拖四個月,洪永城對內外兼備、入得廚房、出得廳堂的女友讚不絕口,為急箍絕種好女友更斥過千萬買觀塘豪宅,日前拍拖去地盤巡視新愛巢。洪永城成個老襯從此被困咁樣,睇怕好快步好友黃翠如、蕭正楠後塵,拉埋天窗。

 

撰文:東方新地 圖片:新傳媒圖片、Instagram

洪永城 急箍絕種好女友

上月在萬千星輝頒獎典禮上,洪永城與黃翠如一齊頒獎給蕭正楠,結果蕭當眾多謝太太,自爆與黃翠如早已秘婚,而當時洪永城被嚇至目瞪口呆。好友修成正果,洪永城亦搵到自己人生的方向,宣布結束年半的單身生活,公開與模特兒兼長跑教練梁諾妍(Inez)拍拖。

撻著四個月

單身年半的洪永城,感情終於有著落,與模特兒兼長跑教練梁諾妍(Inez)拍拖四個月,他直認雙方在了解中,求傳媒唔好嚇走佢,仲對女友讚不絕口話:「佢係好女仔,好多優點、太多,要講兩個鐘頭。」