如果這樣生活

【如果這樣生活】大難不死但以後不能運動!余德丞爆喊:冇辦法,但我會揀要條命!

無綫節目《如果這樣生活》昨晚播出第六集,嘉賓余德丞(Dickson)去咗日本一個偏僻小島,體驗慢活人生,Dickson去年於球場踢波期間昏迷入ICU,幸而大步檻過,在節目重提生死一刻,令余德丞最難過是醫生告訴他要放棄做運動,令從小熱愛運動的他哭成淚人⋯

 


撰文:東方新地 | 圖片:新傳媒圖片、影片截圖

余德丞大難不死

29歲嘅余德丞係前香港游泳代表隊,從小熱愛運動,2018年,他於球場踢波期間昏迷,經歷了死亡10分鐘,Dickson明白生命無常:「呢一刻,你嘅心仲跳,但下一刻,你唔肯定!」回憶當日昏迷情形,他說:「當時我喺球場踢波,覺得自己有啲唔妥,所以踢咗一陣就換人出場邊休息,我原本係打算休息一陣,以為飲啖水冇事,點知一瞓就兩日。」最後醫生診斷為心律不正,比正常心跳超出三倍有多,心臟不能正常運作而暈倒昏迷。


康復但以後不能運動

Dickson在節目中表示「運動佔咗我人生大部分,甚至可以話係我成個人生㖭!」但康復後,醫生說他可能以後也不能做運動後,心裏非常難受,期間Dickson在鏡頭前爆喊:「運動佔咗我人生大部分,甚至可以話係我成個人生㖭!因為我從小到大,由小學開始已經喜歡運動。」


Dickson喊住續說:「我仲想可以喺球場上搏命,如果真的不能踢再波,人生還有什麼意義?」



余德丞
在節目中余德丞重提去年球場昏迷事件,哭成淚人。

 


要對自己及家人負責任

但德丞能由死門關中走出來,是不幸中之大幸,他認為冇事情比生命更重要:「但係回頭又諗,如果大難不死,餘下嘅時間係選擇生命定係運動,冇辦法,你仲係會揀要條命,因為你要對自己同家人負責,所以一定要接受呢個事實!」


會顧及媽媽感受

余德丞話以前經常玩到夜,都冇理時間幾點,但自從經歷昏迷事件,他學懂保重身體,也唔會令媽媽擔心,如夜歸會主動打電話給媽媽報平安。


余德丞日前出席活動,講到在節目上重提昏迷入院落淚,他說是忍不住落淚不是做假,仲話擔心喊到好核突,他更透露余媽媽有陪佢去日本拍攝,都睇到佢喺鏡頭前爆喊。其實Dickson身為家中獨子的他從少與媽媽感情甚好,意外後,Dickson媽媽擔心之餘也細心照顧,他要好好保重自己不要再令媽媽擔心了。


即Click睇片:

播出後,網民紛紛留言鼓勵,話生命要最重要運動是其次,而且運動都有很多種,更有網民話佢面色唔好,叮囑佢好好保重身體。