容祖兒

【容祖兒演唱會】重溫頭三場精華|祖兒免費請觀眾再睇騷

容祖兒一連18場「 PRETTY CRAZY JOEY YUNG CONCERT TOUR 」演唱會於本周一 (5日 ) 正式開鑼,雖然遇上大罷工令交通受阻,舞台機件又發生故障,令祖兒好抱歉,尾聲時祖兒宣布8月12日取消放假,叫觀眾保留票尾,當晚入場免費睇多次騷!

撰文:東方新地 圖片:新傳媒圖片、IG

容祖兒演唱會 個唱開鑼機件故障

為遷就部分遲到嘅歌迷,首場演唱會延遲至9時15分先開騷。著上一件LED雪花裙,企喺好似星球嘅升降機上唱住〈 空港 〉登場,之後祖兒換上 one-piece 緊身衫大晒長腿,鬼咁性感!唱〈 逃 〉嗰陣,祖兒被男 dancers 抬起,氣勢十足,祖兒除下披肩話:「 歡迎到場嘅觀眾朋友,多謝你哋!」然後同大班 dancers 又跳又唱一連串快歌,令現場氣氛 high 爆。不過頭場演出舞台機件頻頻發生故障,中央台板未能合上出現一個巨窿,十分牙煙,工作人員甚至要合力將鋼琴搬上台,祖兒哽咽向觀眾道歉:「 真係萬分抱歉,有好多技術上嘅不足。」