5_1151A_catc_P20_22

59歲黃子華事隔17年再自編自導自演 發福回春再戰賀歲電影

去年完成26場棟篤笑笑《金盆𠺘口》封咪作,黃子華即閉關過其隱世生活,不過,才子終歸係才子,要放慢工作步伐談何容易,休息冇耐已蠢蠢欲動,更秘密打造今年賀歲片《乜代宗師》,相比去年收4,470 萬的賀歲冠軍《棟篤特工》,今次子華神包辦編導演員一腳踢博到盡!

撰文、圖片:東方新地


黃子華回歸影壇相隔17年再自編自導自演

出名要求高的黃子華,每個作品都嘔心瀝血,試過閉關創作搞到壓力爆煲,去年完成的《金盆𠺘口》棟篤笑封咪作,籌備足足四年先肯放上舞台,今年子華神更食住去年《棟篤特工》勁收4,470萬再戰賀歲電影檔,更是相隔十七年,繼02年《一蚊雞保鑣》後再次自編自導自演之作。據知情者透露:「喺創作《金盆𠺘口》時,佢收埋自己完全唔見人,好似跌咗落深淵咁,嗰刻佢真係諗過,完成演出之後,畀自己放一個悠長假期,可能會三幾年之後先會再有大Project,不過,休息一排靜極思動,好多構思湧出嚟!佢先決定再出關拍賀歲片!」

《乜代宗師》黃子華是相隔十七年,繼02年《一蚊雞保鑣》後再次自編自導自演之作。

子華演出馬家雷拳第十九代傳人,自己亦要落場打埋一份。

身做齊編導及演員,子華每場戲都緊張監控拍攝。

雖然拍戲經驗豐富,不過遇神級對手黃子華,心悠 BB 亦表現謙遜,不時聽子華神教路。

子華神力求完美 編導演員一腳踢

因為要趕賀歲檔,加上子華力求完美,拍完唔滿意會大刀剪走,近日仍在趕拍煞科戲,製作相當嚴謹。日前,子華神同心悠BB在尖沙咀街頭拍外景,擔任編導演員一腳踢的子華神,在拍攝現場同攝製隊密斟,拍攝每個鏡頭都親自打點一切,落場演出前自己睇好晒位,演完又負責睇 play back,分身做多個崗位,難怪一直眉頭緊鎖,就算女神心悠 BB興高采烈同工作人員及蝦頭傾到興起,路過身旁的他都完全冇插嘴, 更突然谷起泡腮賣萌,相信腦內仍不斷盤算下一場演出同製作構思!

相隔兩年再戰賀歲檔的子華神,日前同心悠BB在街頭拍外景,子華神將之前的白髮染回黑色,平日鋼條身形的他睇落比前飽滿, 在街頭監控拍攝時,更突然谷起泡腮賣萌!

除咗落場演出,子華神更不停埋位睇機,監控每個拍攝情況

仲要指導演員走位,全程眉頭深鎖緊張大師上身!

回春有術59歲仍狀態大勇連場激戰唔同用替身

相比上年套賀歲片王《棟篤特工》,今次在《乜代宗師》中,子華神 要演馬家雷拳十九代傳人,因為有唔少動作場面,同西洋女拳手心悠有 連場激戰,特訓女神之外,自己亦準備充足應付動作演出,下年就登六的他,冇見一排鋼條身形變得飽滿,現場所見,為電影染回黑髪的他,一身格仔恤衫加西裝,造型驟眼睇似足《男親女愛》個抵死師爺余樂天,相距十九年還原余樂天,認真回春有術,因為試過埋首創作搞到壓力爆煲,近年他相當注重健康,一得閒便會行山跑步操fit,日子有功練出鋼條身形,而去年七月完成《金盆𠺘口》閉關休息大半年先再投入新工作,今次拍攝新片的確狀態大勇!


子華日前為電影開工,打扮卻唔係宗師造型,反而穿著格仔恤衫加西裝,造型更同當年《男親女愛》抵死「師爺」余樂天有幾分相似。

保養得宜的子華,十九年後令余樂天再現都冇走樣!

當日拍完尖沙咀街頭外景,攝製隊轉場到西貢碼頭拍攝,子華神換上一身綠色運動衫,期間更要舞起大關刀,見他打得好有姿勢。

子華神更行落碼頭旁的石級舞刀拍攝。

拍完一段戲,子華神飲住水同劉心悠交流演出。