明星鬼故

20個明星鬼故大合集 電台、電視城真係有鬼同你OT?!

最強精選

廣告

其實踏入農曆七月,已屬歷時一個月嘅鬼節,到農曆七月十四的祭祀活動最多,有指係陰氣最重。而電視台電台被喻為陰氣重的地方,加上唔少藝人拍戲拍劇都喺凌晨時間,所以多年來不時有藝員、明星遇見疑似靈異事件,令人毛骨聳然。今次就嚟應吓節,為大家精選20個明星鬼故,話雖信則有不信則無,但都提提大家:膽小者慎入!

 

撰文:東方新地|圖片:新傳媒圖片、YouTube、微博

20個明星鬼故事大合集 電台、電視城真係有鬼同你OT?!

入廠禁忌唔好向上望黑布冚鏡頭

話說將軍澳電視城未落成之前,大台總部位是於清水灣電視城,而其前身係昔日邵氏影城,當年有多個影星及導演曾在邵氏宿舍自殺,加上已故影星傅聲亦是在清水灣道汽車失事而死亡,故電視城鬼故層出不窮,勁多藝員同工作人員亦曾經撞鬼。又有傳靈體好鍾意睇人拍戲,當所有燈都向下打,佢哋只能匿喺燈上面陰暗處,而藝員間有個不成文規定,入廠唔會向上望,否則就好易見到污糟嘢!又係喎,鏡頭甚少影向燈光頂,真係愈諗愈驚!

1.林峯:休息室最邪

談及將軍澳電視城男休息室,峯峯不寒而慄:「個男休息室好邪門,試過有次入去瞓覺,吩咐咗個PA一個鐘後入去叫醒我,我瞓瞓吓扎醒,見過晒鐘,咪入廠問個PA點解唔叫我?點知佢話入到去見我唔到。咁邪!自此我都唔敢再入休息室瞓覺。」除咗呢件事,林峯原來亦試過在屋企見到女鬼,「事發喺兩年前,我記得嗰晚好攰,瞓瞓吓俾女鬼『責』,佢壓到我手腳郁唔到,精神係醒嘅,突然寒一寒,見到佢去到床角位,有陣煙,有一個人影,我心諗死火喇!避都冇得避,我試圖郁,佢就愈大力,我同佢講︰『我好攰,第二日要開工,求你俾我瞓啦!』 佢個影就慢慢走近我,仲同我講國語︰『就是他,就是他……』 之後就消失咗!」

2.Bobby畀鬼拍醒

除了峯峯之外,歐陽震華(Bobby)都喺男休息室遇過怪事:「嗰日係日頭,見未夠鐘入廠,咪喺男藝員休息室瞓覺。點知突然俾人拍醒,我好清楚聽到一聲大力拍大髀嘅聲,我扎醒咗,但成個男藝員休息室都冇人,我成身都唔郁得,維持咗一陣,之後我望一望錶,可能夠鐘入廠,嗰啲嘢想叫醒我!有工作人員話有細路仔嘛,但我就未見過。嗰次之後都冇再入過去,咪搞!」

3.吳卓羲 目睹同事鬼上身

已離巢的吳卓羲都見識過將軍澳電視城男休息室嘅恐怖!不過唔係佢自己有事,而係佢同事!吳卓羲曾於男休息室遇上怪事,回到2003年時:「當年拍《英雄•刀•少年》,因為趕戲日接夜咁拍,我同成班訓練班同學都喺休息室瞓覺。點知瞓瞓吓,隔籬個同事突然講嘢,好似鬼食泥咁,但聽唔明佢噏乜,最恐怖嘅係佢把聲變咗第二個人把聲,跟住其他人都俾佢嚇醒,成班人驚到雞飛狗走!」

4. 滕麗名女廁撞邪

當年滕麗名剛加入《真情》劇組,《真情》於舊清水灣電視城6號錄影廠拍攝。而6廠位於舊城較入、亦較陰一邊,最近6廠女廁更係全城「陰中之陰」,以往已傳出過不少鬼故,所以好多藝員都避之則吉,情願行遠兩步去其他廁所解決。偏偏有一晚阿滕人有三急,惟有硬着頭皮衝入去6廠女廁解決。該女廁共有4格、4個洗手盆和4面鏡子,由門口至貼牆依序排列。佢揀選最近門口廁格,衝入去以最快速度解決後,即時衝返出來用第1個洗手盆洗手。當佢邊洗手邊望向鏡時,竟發現自己個樣出現喺最後一塊鏡中,嚇到佢標冷汗,即時以極速跑返入錄影廠!

 

5. 奶茶婆婆:你飲咗未?

早在滕麗名之前,已有令人毛骨悚然「奶茶婆婆」故事,地點都係6號廠同一間女廁!話說有工作人員如廁時竟有人敲門,突然有把婆婆聲音說:「你飲唔飲奶茶呀?」工作人員以為係同事開玩笑,只怒吼一聲:「咪玩啦!」事後佢跟同事人談起此事,有位警衞哥哥即言之鑿鑿說:「又飲奶茶?之前有個夜班同事當值時都有個婆婆走嚟問佢飲唔飲奶茶,夜媽媽人影都無隻,邊度會有婆婆、邊度會有奶茶呀,個同事醒目知道自己撞鬼,咪好禮貌咁拒絕咗囉!」

閂廠冚機原來係行規!控制台嘅人會望到機裏面影嘅嘢,所以唔係正式錄影時,工作人員會用黑布冚住鏡頭,以免睇到污糟嘢!

6. 張家輝夜聞口哨聲

張家輝亦曾於清水灣電視城遇上口哨鬼,事發於半夜時分,當時佢正於四廠趕拍劇集《騙中傳奇》,突然成組人聽到廠內傳出口哨聲,即使拍攝期間亦未停過,但拍完之後睇重播,卻聽不到之前口哨聲,令在場所有人毛管戙!

7. 鄭伊健險冇命

鄭伊健一向都大唔透,有次佢趁放假相約一班幕後人員,於黃昏時分到電視城打War Game。當時八個大男孩在民初街上拎住武器你追我逐,玩了個多小時後戰事結束。眾人打算分車離開時,領隊鄭伊健數人頭離開,數來數去都是九個人,當時有人以為他玩嘢嚇鬼,但他卻一臉認真。其中一人代伊健再數一次,結果同樣是九個人,眾人不敢再考究,極速走人。

除了打War Game出事,伊健亦試過在電視城錄影廠內遇上怪事!當時佢正等埋位,期間瞓在地氈上休息,突然有盞燈由高處跌下,正正跌喺佢身邊。伊健事後說:「發生意外後,有位有陰陽眼同事話之前見有個穿小鳳仙裝女人坐於燈槽上,盞燈無整傷我,可能佢同我玩啦,不過我以後入廠都唔敢唔拜神!」

8. 姚子羚遇冇腳女鬼?

姚子羚曾試過開工時撞鬼:「有一日拍《棟篤神探》拍到半夜,當時化妝間除咗我之外,仲見一個着灰色T恤長髮女仔,低着頭坐喺化妝間嘅一角,驟眼睇佢唔似藝員,又唔似化妝阿姐,以為係生面口臨時演員。我冇理就瞓一陣,突然感覺寒風陣陣,我就扎醒,跟着我支唇彩跌喺佢附近,我去執時唔見佢雙腳,起初我以為佢雙腳瑟縮喺櫈上,我睇真啲,佢冇腳之餘,原來個樣模糊到不見五官。當時我勁驚,即刻跑出走廊比較光猛地方!」

9.化妝間的腳步聲

另一則傳聞發生於清水灣舊廠化妝間,事發時有兩位負責梳頭、化妝員工,閒來無事,坐於化妝間睇電視,突然聽到有「人」行入嘅腳步聲,喺鏡子睇到係一名中年男子,佢哋以為有人需要化妝,點知一轉身竟然鬼影都冇隻!此外,道具部走廊亦一直流傳有「人」身穿旗袍,經常於深夜時分喺走廊走來走去,至於係人定係鬼,咁恐怖,梗係冇人敢去證實啦!

10.鬼阻去食飯

話說某晚,有兩名工作人員打算從地下搭電梯上二樓飯堂食飯,當電梯門打開時,二人見到一男子行出來,初時大家不以為然,當到達二樓打開門時,方才於地下步出嘅男子竟然又於二樓入電梯,嚇到兩人目瞪口呆!

11. 朱茵「有嘢」拍打浴簾

昔日女神朱茵早年在內地拍戲入住一間酒店,沖涼沖到一半聽到「有嘢」不斷拍打浴簾!因為明知房間及浴室只有她一人,根本沒理由「有嘢」拍打浴簾,但朱茵鎮定地拉開浴簾,幸好而冇看到任何東西,到底是靈異事件還是冇關窗被風拍打?真係不得而知!

12.舒淇妖艷造型突出現

舒淇接拍名導演許鞍華的驚栗片《幽靈人間》時,也發生過疑似靈異事件。此片開拍以來靈異事件傳言份外多,戲中舒淇有兩個造型:濃妝艷抹、清純淡妝,其中一場戲講述舒淇和陳奕迅在黃大仙廟為女孩驅邪,舒淇演該場戲本以清純形像出現,但現場一個熒光幕突然眨了一眨,工作人員看到播出舒淇妖艷造型的片段,起初以為錄影機播錯舊帶,但機內未放入影帶!而目睹怪事經過的女副導和錄音師曾考慮停機,但怕影響拍攝進度和演員情緒,沒有告訴舒淇也當沒事發生,直至套戲拍完才告訴她!

 

13.衛詩雅 荒廢屋苑聞小朋友聲

藝人衛詩雅08年拍《很想和你在一起》時,由於開工時間很長,未埋位時衛詩雅在車裡休息,睡到一半,她聽到車外有小朋友玩耍的聲音,有笑聲、追逐聲,當時她沒有張開眼繼續休息,她說:「過咗一段時間到我嘅戲份,工作人員嚟叫醒我,我一張開眼發現身處一個荒廢嘅屋苑,現場見唔到小朋友。我就問工作人員小朋友喺邊?他答我冇小朋友啊!嗰度要申請至入得,而且都冇小演員。」但衛詩雅堅持真係聽到小朋友玩耍的聲音,工作人員面色一沉,為安心就叫她上香拜一拜才去開工。

14.徐若瑄遭男人身影掐頸

徐若瑄早年在綜藝節目透露94年她某次到日本工作,和工作人員住同一酒店房,房號是4701。那晚因為她很累便先睡。睡到一半,她突然覺得身體動彈不得,驚見一個肥胖男子的身影壓著她和掐著她的頸!她幾經掙扎終於醒過來,問旁邊的助手為何不幫她?助手卻說自己一直在旁看書,根本察覺不到異樣,此時檯燈突然熄掉,電視機竟自動打開播出黑白雪花畫面,廳外也傳來有人猛烈跑動的聲音,嚇得兩人立刻衝下樓!時已夜深,二人幾經辛苦終於換到房,卻是下一層的尾房3701。

兩人當時嚇到睡不了,直到凌晨二時電話響起由助手接聽,電話裡有把神秘男聲說要找Vivian,問她住幾號房!Vivian立即叫助手掛線,但同一男聲不斷打來找Vivian,她們只得把電話筒拿起。翌日早上兩人要求劇組換酒店,而徐若瑄本身以「0000」設定密碼的行李箱卻一直無法打開,及後工作人員成功開鎖,卻發現她的密碼是「4701」,受驚的徐若瑄事後回台灣病了一場。及後她遇見一位同樣住過那酒店的台灣經理人,雖然對方不是住同一間房,但對方夜晚想開窗看東京夜景,卻看見下面全是墳墓,好邪!

電台靈異事件簿:

15. 淒厲叫聲嚇窒森美

除了電視台,有指電台亦屬陰氣重的地方,故此也曾傳出靈異傳聞!森美、小儀曾在深夜節目《架勢堂》中接聽眾電話講鬼古,直播期間有聽眾致電準備講述遇鬼經歷時,突然電話中傳出另一把女聲發出「唉」一聲慨歎,兩位主持均驚聞怪聲,惟女聽眾表示家中並無其他人,嚇到一向轉數快嘅森美騰晒雞,即時播歌避開話題。當歌曲播完,森美率先開聲道歉說:「有怪莫怪,細路仔唔識世界,今次真係有排驚。」

膽小者!!!慎入!!!

16. 女鬼送客

另一商台前男DJ表示,多年來都斷斷續續傳出怪異事件,當中最嚇人包括「電梯槽女鬼送客」同「半身人」!「多年前有兩個電台DJ喺凌晨時份收工時搭電梯,商台到夜晚10點就會鎖前門電梯,所以佢哋搭後門電梯離開,當時佢哋由3樓搭落地下,而其中一人無意間向上望時,發現電梯槽抽氣扇位有個女人頭俯視住佢哋,個DJ直頭嚇到唔敢出聲,又唔敢同隔籬嗰個講⋯⋯」隔咗幾秒鐘,佢又再向上望,發現個女人依然喺度望實,真係嚇到死咁滯,架電梯一到地下佢即刻拉埋另一個DJ急急腳走,直至離開商台至敢講出嚟。」

17.半身人凌空飄移

好多年前,商台啲夜更司機都會貪方便喺公司後欄開張帆布床瞓,有次有個男DJ半夜時想搵茶水阿姐,於是走埋去問個司機知唔知阿姐去咗邊,問咗兩句個司機都無理佢,於是佢用手拍個司機膊頭,拍咗兩吓個司機終於有反應,不過依然係用背脊對住佢,無出聲咁企咗起身,個男DJ嗰刻先發現個司機只得上半身,下半身係凌空飛起飄移,當堂嚇到拔腿就跑,事後病足成個星期!

18.潘紹聰見鬼

曾主持《恐怖熱線》嘅潘紹聰,笑言多年來都聽過唔少鬼故,自己亦親身經歷過:「記得有次主持節目,從控制台玻璃倒影見到有個黑影喺我背後閃過,當時自己都嚇咗一跳,因為好少會on air時有人走入嚟,轉頭一望發現根本冇人,個心即時寒一寒。」潘紹聰續說:「但當時個聽眾仲講緊鬼故,所以當時我都強裝鎮定,呢個時候突然無端端有把女聲『呀』尖叫咗一聲,事後我再聽番段聲帶都一樣聽到!」

 

19.港台有鬼車

某港台前女DJ爆料,該台其實都好猛,最經典莫過於夜班看更所見所聞。「一到夜晚,港台都會閂閘,職員每次出入都要由夜班看更開閘,有晚個看更聽到從遠處傳嚟幾聲撻匙聲,知道會有車駛出,所以就起身準備開閘,點知一行出更亭,就見到部黃色嘅私家車穿過閘門而出,但閘門冇爛,嚇到個看更即時辭工!」

20.禁播鬼歌〈夜夜癡纏〉

麥潔文除了於電影《靈氣迫人》演女鬼,更主唱主題曲〈夜夜癡纏〉,據說係全港電台嘅禁播歌!因為每次深夜播放時,都會發生極度恐怖嘅靈異事件!有傳因該曲開始時,麥潔文哼出「嗚嗚聲」,特別容易招惹靈體,而有DJ曾試過深宵播放時,發現黑影閃過,聽眾聽了後又被鬼壓。

最恐怖一次係播放時有另一把淒厲女聲,悲鳴咁邊喊邊哼歌,電台人員之後重聽該把女聲仍在,嘩,真係令人不寒而慄!