放棄高職來港零開始 國際知名腸道微生物專家黃秀娟教授：克服人生難題成功揭開便便奧秘
作為一位國際知名的優秀學者，在做出成績、成功為大眾健康帶來改善之前，黃教授人生中亦經歷過不少艱難時刻。
她出生於馬來西亞檳城、在英國倫敦大學獲得內外全科醫學士，後於倫敦帝國學院取得博士學位。留學英國前的她，成長期從家庭兩代中學懂了何謂堅毅。
「我公公係福建人，好細個從中國大陸移民去檳城，佢十歲喪父，賺三蚊畀錢養媽媽及兄弟姐妹。去到二十歲同我婆婆結婚，生咗七個小朋友，六個係仔，得我媽咪一個女。公公二戰時代開古董店養家，佢好錫我媽咪，但婆婆比較錫啲仔、會認為我媽咪有責任照顧哥哥同細佬。公公尊重人、有愛心、唔怕辛苦。佢係一個好榜樣。Actions speak louder than words，我媽媽深受公公影響。」
她的舅父們很多都是醫生，只有媽媽一人中學畢業後犧牲上大學，「所以我媽咪好重視我哋嘅教育、飲食同健康。」她說。
黃教授想成為醫生，馬來西亞的升學機會卻不多；當有機會到英國留學，她當然十級興奮，可是對父母親而言，則是一大挑戰。
房間小．啟發大
「讀醫要讀五年，嗰時英鎊兌馬來幣係一乘十一，好高好高！媽咪話要計劃一下我嘅學費，我最想去倫敦，但錢其實唔夠，因為倫敦學費好貴，所以我壓力好大，亦都幾驚。其他朋友去英國讀書，佢哋嘅父母會跟住一齊飛過去，但我就得自己一個人。我要同人合租，間屋有兩個房，一個好大，一個好細，我揀咗平嘅細房，間房不足30呎，只足夠放床同枱，我根本都活動唔到。我見到間房嗰一刻真係喊，唔知點算好，原來喺檳城時我係咁幸運嘅。」
我：「我覺得嗰間30呎嘅細房，為你人生帶嚟好正面、好大嘅影響。」
黃教授：「影響大到都已經係二、三十年前嘅事，呢一刻我仲有visual memory！好記得我喺間房望出去係個back yard，我好喜歡大自然，好喜歡green，反觀面積大嗰間房望出去係馬路，所以凡事都要自己心態調節，但過程唔容易，因為人好容易睇嘢half empty，要將自己變成一個half full嘅人，要時間去克服。」
我：「教授，你部手機要有幾多個percent嘅電量， 你先至覺得安全？」
「好有趣嘅問題。」
黃教授笑著說：「我見到80、90 %以下已經想叉電，但我個女就話：『其實你而家仲有好多電，點解要去叉呢？』我個仔更加去到10、20%都未驚。我哋教小朋友，但其實小朋友都教識我好多嘢，我知道心理上我應該做乜嘢，但有時行動上又未必做得到。」
她會否希望子女於30呎房間內感受人生？
「作為家長，我雖然modern但亦都傳統，可能受到我祖父母嘅影響，我覺得家庭嘅bonding好重要，我感覺佢哋缺乏咗呢樣嘢。另外，有啲嘢係要自己去爭取嘅，現在物質太豐富啦，我認為佢哋要經歷自己搭巴士、搭港鐵。小朋友開心、健康最重要。我相信nature and nurture，我自己經歷過好多，覺得後天嘅健康最緊要。」
失敗其實很正常
黃教授笑言自己機遇不少，當中驚喜、驚嚇兼備。今天的她，和小時候的自己分別可大？後天際遇又有否改變她的先天？
「我諗我有完美主義，當事情超出我嘅控制範圍，就會冇安全感。原來凡事都可以後天鍛煉，但過程非常辛苦，所以我鍾意study psychology，探討人性到底係點。我不停同我嘅小朋友講，其實好多嘢你天生係咁唔緊要，假如你想去到一個位置，with training，with practice，你係可以做到嘅。我又唔叻、又怕醜、又唔鍾意講嘢，但我觀察、我學習，我把握機會。其實好多人都有好多機會，但未必個個想跳出舒適圈。人人都參考別人嘅成功故事，我就覺得應該share一啲失敗例子，有失敗經驗其實好正常。」
黃教授坦誠地分享她的一次珍貴失敗…
「我做學生時，人生第一次講talk。面對一千觀眾，我做足功課，背熟晒每一個細節。好多時喺你最ready嘅時候，最意想不到嘅事就會發生，呢個就係人生。有一位教授走出嚟，批評我做嘅研究係垃圾，嗰一刻我其實唔知點反應，我仲講thank you very much，成個會堂靜晒。好多時，我哋需要有咁嘅經歷，但作為一個學生，我當時唔明白個道理，我係可以變得自暴自棄㗎，但往後回想番，你只會笑一笑，而嗰位教授都唔記得咗呢件事（笑）。」
黃教授認為人生是從錯誤中學習，我們不會因為獎項、獎金、獎品而上到一課。她的挫敗經歷豈止這一件，「最大挫折，由搬嚟香港嘅第一日開始（大笑）。我平均十六、十七年就換一個居住地，我人生有三個階段：十五、十六歲離開屋企去讀書；跟住有好嘅工作offer，又喺英國住咗十六、十七年，諗住會settle down嘅，但後來遇到我丈夫，佢喺香港出世，然後移民澳洲，我再喺英國認識做律師嘅佢，同一時間我遇到沈祖堯教授，佢offer我嚟香港工作，從新開始。我喺英國工作至高級職位，要由重要嘅人變成nobody其實好難，我人生三個好大嘅決定： 第一，搬過嚟結婚，開始新工作；第二，要放棄英國嘅高職；第三，我啱啱讀完PhD。」
「你丈夫係你當時做決定嘅主要因素，愛情支持你。」我說。
「我覺得係，愛情有時係blind嘅，根本冇用邏輯去考慮。其實我係一個幾情緒化嘅人，我相信直覺。香港比較近馬來西亞，我另外一個考慮就係家人。」
要是她的丈夫不給予來港的支持，事情不會發展至此。
「嗰一年好難過，係我人生中最差嘅。」她續道：「我係福建人，真係一句廣東話都唔識。身為一個喺病房睇症嘅醫生，我曾經係局外人。由局外人變成體系一份子，歷時十五年，性格自我啲都可能放棄咗。第一，我一搬到香港，我丈夫就被調到上海工作，係我人生中最worst嘅消息，我點可以自己喺香港生活呢？雖然佢第二年返番香港，但第一年對我最重要，我要適應新生活，仲要每個周末飛上海。不過，當你經歷過最壞，其他嘢就會變得更好，我情願先苦後甜！另一個消息係沈祖堯教授做中大校長，請我嘅人走咗，上司變成陳家亮教授（前中大醫學院院長），我要同新嘅上司合作。而家look back先知道係blessing，但嗰一刻你唔會咁諗。」
四十萬億的好奇
本人近月飽受腸胃不適困擾，動輒肚瀉。跟黃教授這位醫學權威見面，又怎能不「腸談」。
她說：「我做醫生幫病人睇症，我覺得有滿足感，因為我幫到個病人，但一日可以睇幾多病呢？當英國嘅教授介紹我做科研、讀PhD嘅時候，就開啟咗我嘅心。我細個好鍾意睇星星，去探索一啲人哋唔知嘅嘢。有一位教授話，我哋腸入面有四十萬億細菌，而好多細菌都未知係乜，嘩，原來咁神秘，刺激起我嘅好奇心。最初我冇諗過研究細菌嘅，直到我嚟咗香港，我有機會去探索炎症性腸病。你喺適當嘅時間，碰上適當嘅地點、人物，把握機會你就可以起飛！ 陳家亮教授支持我去研究，當時我想聯同外國人一齊去做research。佢教咗我一樣嘢，佢話點解你唔獨立做第一個亞洲嘅研究？於是我從零開始，one man band走訪大概二十個國家、地方，邀請學者合作研究，成功建立呢件事，令到香港喺炎症性腸病研究中，列入亞洲重要之位。」
黃教授經多年研究，在便便中發現了炎症性腸病和自閉症的新微生物特徵，成功開發精準工具，以非入侵性方法快速和準確診斷自閉症及炎症性腸病。在過去，這兩種疾病的診斷既複雜且廢時，現在能更早發現，同時也減少了高昂的醫療費用。
「我已經見到便便同細菌可以改變世界，我希望有一日令香港成為領導。我嚟咗十五年，香港係我家、我小朋友嘅家，我好感恩，亦冇後悔做過嘅所有決定。但我仲有目標未達到。Innovation and technology不斷進步，做任何嘢都一定要創造價值，最好有一日我小朋友嘅小朋友會話你媽咪發明嘅嘢，我哋而家用緊呀，全球都用緊。我嘅目標就係將便便裡面啲細菌，變成例如藥物，或者可以去診斷自閉症、認知障礙症、同年齡有關嘅疾病等等。」
變成一盤生意又是另一種毅力，在繁忙的科研工作以外，黃教授的營運力度從何而來？
「唔同人有唔同性格，有啲人鍾意日日做同一件事，一個團隊裡面其實係需要呢啲人嘅，但我怕悶，我發現日日學一啲新嘢，同新嘅人合作， all the language is very different。我覺得做生意有少少似過山車，有時好刺激、好high，例如有投資者對我哋有興趣，嘩，原來我哋咁勁，但之後又跌番落嚟，我哋今次唔投資喇，我們搵咗另一間公司。我覺得要做企業家，適應力要好強。其實我每分鐘都工作，啲人問有冇work-life balance，我覺得其實冇嘅，如果你可以將生活、工作一體化，去到你又開心、你又承受到，其實已經成功咗。」
人生很難，要成為自己喜歡、別人接受的自己，加上工作順利、身心健康，其實絕對不易。黃教授寄語大家：「If you are bitter，it’s fine to be bitter，有一件事我學到 — 接受。同自己講我今日唔開心、我今日身體唔舒服，冇問題，你今日唔開心，聽日唔好keep住唔開心，跟住就要問自己：『我點先至會開心呢？』有啲嘢你控制唔到，但你可以控制你自己點樣去面對。喺一個機構工作，男性、女性每個人都有自己嘅強項，先問問自己有何貢獻，你擁有男同事冇嘅專項，你已經贏咗。」
我問：「未必事事稱心如意，你容許自己唔開心幾耐？」
她說：「你越成功，你唔開心嘅時間越長，因為你對自己、對身邊嘅人要求越嚟越高，所以要保持意識，要不停提醒自己。我會去跑步，因為我個腦冇時停、每秒都諗緊工作，跑步時我會聽音樂，聽自己嘅腳步聲，好放鬆。滑雪同跑步令到我完全relax，滑雪時我唔想跌倒，就會好conscious，而跑步就係我嘅me time。」
