78歲羅家英自爆四度患癌後最新病情曝光 超豁達面對兼透露老婆汪明荃態度
廣告
78歲羅家英早前接受內地訪問時自爆四度患癌,並表示唔會接受化療。日前(9日)羅家英現身電影活動擔任頒獎嘉賓,事後接受訪問時家英哥亦大方透露現時嘅身體狀況,以及接下來嘅工作安排……
羅家英最新病情曝光
羅家英日前精神奕奕現身活動,在接受傳媒訪問時亦大方透露病情,並表示身體目前幾好,不過就需要多休息:「係弱咗嘅,因為打咗啲針個人係虛弱咗,同埋糖尿會增高,同埋會貧血,唔多夠氣,所以,成日要瞓覺」。
家英哥亦透露接下來嘅治療方針:「今日見咗糖尿醫生,醫生話我好嚴重要打針,咁所以我由聽日開始要打針喇」,並稱需終生接受注射。隨後再表示:「遲啲會再去睇泌尿科醫生,就再打女性荷爾蒙嘅針。」

羅家英大爆老婆汪明荃態度
羅家英在訪問中更大爆老婆汪明荃勸他少在人多的地方逗留:「叫我即刻走,唔好喺到啊,唔好畀人訪問啊,訪問係最嘥氣」,不過亦稱知道大家都好關心自己,所以都會照接受訪問。
而當被問及汪啊姐會否做佢私家看護時,家英哥就鬼馬表示:「佢被我看護」,又爆笑稱老婆現時對自己態度唔同曬:「佢對我和藹咗好多喇」。

未來工作與演出計劃
羅家英亦提及擔任莫文蔚演唱會嘉賓一事:「因為我哋係《大話西遊》合作,大家有個回憶,我哋仲有叫埋《Only You》作者一齊去,我哋叫做大話西遊31年大聚會!」他表示,與朱茵的巡迴話劇《驢得水》還有二十多站要完成,包括鄭州、山東、內蒙古等地,之後將回香港參與粵劇演出,並計劃在11月與汪明荃前往不丹拍攝節目。
