「俠醫」義診病童無數 治病必求治本 黃天賜教授：我由頭問到腳 搵出根源
醫館連同位於馬路對面、幫助弱勢患者的醫道惠民診所均選址深水埗，「因為我自細喺深水埗長大，60年代爸爸嘅涼茶舖喺南昌街同汝州街交界，位置係個濕市街市，當時有好多民生工藝，有人喺街市打棉胎、有人造木秤，嗰時冇電鑽乜要用人手造，好熱鬧好多嘢睇。」
中國醫館的傳承人黃教授出身自醫藥世家，他是健絡通藥業有限公司創辦人、黃道益活絡油有限公司執行董事、廣州中醫藥大學客席教授、香港城市大學榮譽學士、香港中醫骨傷學會永遠榮譽會長、香港中醫骨傷學會發展慈善基金創會董事，以及香港福幼基金會創會董事。父親黃道益先生，60年代從經營涼茶舖到開中藥醫館，全家服務附近街坊。他受父親影響，後來也選擇了中醫、骨傷跌打科之路，「當年嚟睇病嘅都係我哋住板間房嘅鄰居，個個熟口熟面。嗰時睇醫生要幾十蚊，一般人每月人工只係幾百，所以街坊傷風感冒，都只係去涼茶舖搵我爸爸飲碗涼茶。」
電視與工廠崛起
想當年，他們一家生活在騎樓屋。他是八個孩子中排行第五的獨子，和父母、姐妹們一起前舖後居，後因生活空間不足，一家人租住了騎樓屋四樓的板間房，「我成長期經歷社會環境嘅變化。1967年無綫電視開台，涼茶舖生意立即唔同，晚上好多客人嚟睇電視、玩點唱機，係一個平民娛樂場所。慢慢好多家庭開始買電視機， 70年代製衣廠、電子廠、塑膠花廠蓬勃，我哋板間房嘅鄰居，都去工廠攞膠花、攞牛仔衫布返屋企加工，板間房變晒小型工廠。」
之後涼茶舖生意轉差，從十多名夥計變成零員工，黃家的孩子們都要上陣，「到我大少少，我都幫手秤藥、煮涼茶，爸爸亦開始做中醫。」
我：「知道你細個曾經大病一場。」
他：「大概11、12歲我感冒幾日都唔退燒，醫生馬上叫我去伊利沙伯醫院檢查，結果我患咗風濕性心臟病。當時我體質好差，有一兩年定期要入醫院，每次住半年以上，僥倖最後冇事，慢慢唔使依賴西藥。出院後我跟爸爸學醫，又學十二路潭腿、蔡李佛，仲去街坊福利會報讀柔道課程。」1972年，美國總統尼克遜訪華時參觀針刺麻醉手術，後來引發針灸治療在美國大熱。那時候，黃教授亦對針灸產生了興趣。
打救都市病患者
「點解你後來去咗加拿大生活？」
「嗰時得到爸爸幫過嘅朋友送上兩張機票，兩個大家姐就去咗加拿大，然後我哋一個一個、直到排第五嘅我，都喺1974、75年左右過埋去。我未夠17歲，繼續升讀中學，畢業後就去學牙科技工，因為姐夫係牙醫，佢鼓勵我畢業後同佢拍檔，於是我就加入Dental Lab Technician行列，因而接觸到好多機器，為我帶嚟啟發 — 機器點樣應用喺做藥油方面？當時爸爸醫館已經有活絡油，但生產過程全人手，之後，我慢慢將家庭手作活絡油嘅生產機械化。」
黃教授的加國生活安逸，熱愛攝影的他，因為對祖國有情意結，每年都會抽時間回港，到內地拍攝風土人情相片。黃道益先生在65歲時退休，他亦決定返港接手醫館。
我把握機會詢問健康疑慮，「我成日食止痛藥，點算？」
他說：「中西醫好、疼痛專科好，好多都醫唔到痛症。由細到大爸爸都教我用手指公幫人按摩，搽啲藥油就止痛，冇諗過喺外國社會，病人食大量止痛藥咁嚴重。當爸爸話退休時，我返嚟香港前特登去讀Marketing，除咗想做好藥油生意，最終目的係用我學到嘅止痛方法，去幫助全世界，如果你唔識得處理疼痛，疼痛就會處理你，我會由頭問到落腳，搵出病人疼痛嘅根源。」
一路走來，他醫治過無數腦病患者，經他手處理的腦病兒童達1,400多個，包括了腦麻痺、自閉症、「五遲五軟」發育障礙症者，還有唐氏綜合症等。唐氏綜合症也醫治得到？
「就算美國，腦性麻痺都係以輔助治療為主，並唔係針對性醫治病人腦部嘅健康。我哋中醫，病喺頭頸會主要醫肌肉同筋骨，頸椎復位好重要，但我唔建議普通人去做頸椎復位。我開發咗針對性嘅鬆筋針灸，唔需要留針，因為小朋友唔會坐定定畀你針，腦病兒童包括自閉症、過度活躍症、罕有病、糖尿病、憂慮症等全部都適用。」
他最年輕的腦麻痺病人只得五個月大，由美國回來，他呼吸系統出現了問題，「好多人話問題在於肺功能，唔同醫生、醫師，唔同專家都有唔同角度，但喺我骨傷科去睇，呼吸系統由我哋個腦控制，就正如『久視傷血』（《黃帝內經》五勞七傷理論），眼睛係我哋中樞神經一部分，久視傷血就係眼睛疲勞，疲勞就係裡面嘅血液循環唔好，所有腦部嘅血，頭部嘅血，都由頭頸三條動脈，左三條，右三條血管帶動，頸椎動脈要穿過六節椎孔，所以頸椎稍微移位，血管就會卡住，就有好大機會影響血管順暢度。好多肌肉喺頸前面，頸邊最常見有胸鎖乳突肌，可以摸到嘅，上啲就有翳風穴，如果你撳落去有壓痛點，即係中醫講嘅不通則痛。」
九成都市病來自頸
經驗告訴他，都市人醫不到的病，九成都跟頸有關，因為頸影響腦部血液循環，包括呼吸、打鼻鼾、眼睛疲勞、聽覺不好等問題。很多病人都不自覺有頸椎出事，他們大多說自己失眠，扯鼻軒或頭痛。他表示頸椎錯位的人，很多都兩腳不平穩，不能單腳站著，通常是第一節和第二節頸椎之間壓了神經。
「當個病人行入嚟，我會睇佢姿態、睇睇係咪骨盆問題，如果骨盆有事，我就教佢做運動復位。最好嘅醫生唔係醫生，係病人自己，我研發嘅運動叫健樂操，針對骨盆、頸椎、胸椎、腰椎，因為我哋係脊椎動物，好多病都同我哋嘅脊椎有關。」
《黃帝內經》有一句非常吸引他，就是治病必求治本，「書中話如果搵唔到病因，你可以等病人死後解剖而視之。我覺得好驚訝，因為中醫幾千年前已經將解剖學，應用及記錄喺中醫第一本經書入面，亦都同太極拳、傳統射藝理念一致，所有嘢講嘅都係陰陽平衡。月亮代表陰，太陽代表陽，其實陰陽係咩呢？就係大自然，凡事要睇你自己，你唔可以改變大自然，同我哋中國人做事嘅態度一樣。孔子講嘅，你只能求諸於己，我喺學習傳統射箭時學到同一理論，我哋射箭，中到，大家當然開心，但中唔到有啲人會好憤怒，好似人哋打麻雀牌章唔好，食唔到糊會發脾氣咁，射箭一樣。傳統射藝喺君王年代用嚟選賢臣，選邊啲兵將升級去做官、可以去打仗，睇睇佢哋贏嘅時候會唔會好驕傲，射唔中會唔會好氣餒。」
黃教授義診救治千幾名病兒童，等同救了千幾個家庭，他深明病童家人們的需要。
「社會需要為呢啲小朋友嘅家庭付出更多。我哋耐不耐聽到不幸嘅新聞，家中有長期病患者，全家人情緒都受影響，甚至有啲走向末路。點解會繼續發生呢？明明中醫針灸治療對一啲病童帶嚟好效果，但佢哋唔可以經常嚟，因為一，家長忙搵食，第二，對小朋友嚟講，讀書可能比健康更重要，因為要考試佢哋唔敢缺學，只好嚟少啲治療，結果影響康復治療嘅進展，所以希望有關部門，可以悉心安排一啲考慮因素畀慢性病患者。」
記錄治病經驗
我問：「你同我講過你每日工作12小時，咁你有冇me time？」
「有，我瞓醒我就會寫書。我哋中醫骨傷科醫學文獻唔多，有記錄嘅更加少，我會將自己醫病嘅方法寫低，將爸爸教我嘅骨傷科治療經驗，應用喺而家嘅都市病，譬如最簡單嘅頭痛、失眠、情緒壓力、憂鬱症我哋都醫好多嘅，因應病人嘅狀況，多數一家之主係女性，我都醫埋婦科。呢幾年嘅經驗豐富咗我，所以我好珍惜呢個機會去寫出嚟。我一起身就寫書，去到夠鐘要開診，我就返醫館睇病人。」
強調「健康由頭開始」的黃教授，因應我早年膝傷，親授我兩招運動來舒緩筋骨。他說：「舊傷唔處理，慢慢就變成舊患。初頭係關節勞損，但如果你年紀大關節有問題，就會同肌肉及血管、神經有關，肌肉嘅收縮狀況唔好，會影響我哋高血壓，因為血落到腳上唔返去身體。我成日都講人有三個關卡，第一卡就係頸部，第二卡係胸部，如果你坐得唔直，圓肩就會壓住個胸嘅呼吸系統，特別係女性，會影響胸部嘅血氣循環，有血冇氣，就會形成痰瘀結節，會有婦科問題。如果頸部痰瘀結節，就會有甲狀腺、扁桃腺、呼吸系統暢順嘅問題。由頭到腳人體上、中、下三大部份，年輕人大部分嘅病都喺上部，到咗中年，問題大多數喺上部加中部，係累積嘅，如果你以前有頸痛、有頭痛，你唔理佢，就慢慢累積去到胸部，就有胸部嘅病、去到腸咪會有胃病、糖尿病，再腎病、心臟病囉，一路一路往下伸去到老年時第三卡 — 骨盆。」
TVB劇集《俠醫》男主角、由陳豪飾演的凌為民，以義診無數腦病病童、致力於推廣香港中醫藥文化的黃教授作藍本。他認為陳豪跟自己你有沒有一些共通處？
「劇集好多情節當然都係編造㗎啦，雖然我同陳豪認識唔算太耐，但從交往之中，我覺得有幾樣嘢大家好相似，首先我哋同樣家庭觀念好重，此外佢出身同我一樣都係來自醫學世家，佢對中醫、針灸、推拿都有認識。我教佢射箭吖、太極拳佢都好有氣質，因為佢有運動細胞，佢真係『俠醫』角色嘅不二之選。」
「教授，你認為開心嘅定義係乜嘢呢？」
「人之初性本善，幫到人自然好開心，就算幫唔到人，當我發覺有可以去探討嘅方向，亦都係開心嘅事情。」
撰文：陳小芝
攝影：馮凱宜
