孩子你怎樣長大？｜林奕匡首爾直擊電競中學 揭開韓國政府認可神秘課程
破格教育！上晝讀Chem 下晝名正言順瘋狂打機
Phil今次參觀的這間三統學校大有來頭，於2023年正式成立，全校雖然只有45個全職學生，但補習人數高達幾百人！學校總監Lee Seunghyun受訪時明言，辦學理念就是要「Change the Game」（改變遊戲）。韓國好多家長依然對打機極度反感，但學校正正要證明畀大家睇：打機一樣可以有成功未來！最特別的是，這間中學的學生並非「書呆子」，亦不是盲目打機。學生朝早要乖乖地上化學、數學、英文等傳統學術科目，一到下晝就名正言順轉場「打機」，專攻團隊戰術同溝通技巧。就算將來做唔成職業選手，都可以投身遊戲公司、市場營銷或傳媒等行業，出路絕對唔窄！
10小時地獄式特訓！100%獲阿媽力撐追夢
難得來到，Phil當然要親自落場體驗電競課堂！他坐到綜合班學生Kim Namwoo身旁齊齊打大熱射擊遊戲《Valorant》。Namwoo以流利英文同Phil交流，透露自己兩年前睇完偶像的超強神操作後，就立志成為職業電競選手，最高峰時期更試過一日狂打10個鐘！最令Phil驚訝的，是Namwoo的追夢之路竟然獲得媽媽100%全力支持！兩母子一齊搵學校，最終揀了這間可以兼顧學業同電競的中學。Namwoo更計劃畢業後先入大學，加入大學電競隊繼續雙線發展，思想非常成熟！
Phil見識電競產業龐大
雖然見證到韓國為培養未來電競選手的超前教育，但身為爸爸的Phil，睇法就更加現實同長遠。Phil大讚Namwoo為人單純，英文流利，但同時亦點出了一個盲點：「佢話如果呢個Game唔再流行，佢就唔做電競選手。其實佢只係在乎個Game，而唔係在乎做『電競選手』呢樣嘢。」Phil以爸爸的務實心態分析：「如果你真係要做Professional，就算唔係呢個Game，你玩另一隻Game都要好勁！因為潮流呢樣嘢轉得好快，可能兩年後有另一隻Game彈起，唔通你即刻又要轉行？」看來Phil今次首爾取經之旅，除了見識到電競產業的龐大，亦為自己將來的育兒之路上了寶貴的一課！各位家長睇完，又會唔會對小朋友打機改觀呢？
網民羨慕：香港有得讀就好啦
節目播出後在網上引發熱烈討論，不少觀眾對這所另類學校的運作模式感到驚訝。有網民在社交平台留言表示：「完全估唔到韓國為咗培養電競選手可以去到咁盡，連正規學校都可以畀學生名正言順打機！」、「香港有得讀就好啦」部分家長級網民則被Kim Namwoo與母親的互動所觸動，坦言：「睇完真係要反思下平時點樣對待小朋友打機，原來行行出狀元係真。」亦有觀眾十分認同林奕匡在節目尾聲的感悟，留言稱讚：「林奕匡講得好啱，潮流轉得快，最重要係小朋友有嗰份純粹去做好一件事，唔係淨係為咗做選手而做。」
