愛．回家之三代同糖｜車婉婉樊亦敏扮女僕鬥後生女！被寸成熟爆seed反擊？
三代女僕晒萌樣 樊亦敏車婉婉出盡全力鬥可愛
記者會上，劇組宣布將加開女僕Café新場景，一眾女演員率先以女僕Look現身。羅毓儀（Yuki）、甄敏芳（Jenny）及穎喬（Ziva）組成的年輕組率先登場，大晒日文兼擺出送心心、扮貓咪等經典Cutie甫士。其後「熟齡女僕」車婉婉、樊亦敏及新加盟的沈可欣登場，司儀Desta因一再強調她們「成熟」，終令車婉婉忍不住大叫：「夠喇！講夠成熟喇！」為反擊指控，三人隨即出盡全力嘟嘴、扮貓咪兼單腳企，樊亦敏更搞笑反問：「你話我哋唔可愛？」車婉婉則強調此身打扮是為了「遷就啲後生」。
車婉婉瞓梳化奇招搶鏡 劇組宣布沈可欣加盟
現場「三代女僕」各有各搶鏡，當中以身形高人一等的車婉婉及「新一代TVB美少女」Jenny最為突出，而腳踏三吋厚底鞋的「嬌俏Amy」樊亦敏亦不遑多讓。在拍攝單人照時，車婉婉更使出奇招，以一招「美女瞓梳化」甫士成功搶盡焦點，盡顯前輩功架。活動上亦正式宣布，劇集將有新固定演員沈可欣加盟，飾演「香菇」一角，為女僕Café增添新火花。
侯雋熙被餵食勁受落 曲線激讚熟齡組保養得宜
活動高潮落在分組餵食環節，一眾女僕輪流餵劇中男演員侯雋熙（Duncan）及《女神配對計劃 2》的丁標食生果。被質到滿口士多啤梨的Duncan全程忍俊不禁，但仍不忘賣口乖，曲線大讚「熟齡女僕」保養得宜：「我覺得我擘大眼同闔埋眼望到嘅畫面冇乜分別。」至於丁標被餵食車厘子時雖然略顯怕醜，但全程笑容滿面，令現場氣氛十分熱鬧。
網民洗版勁期待：「熟女僕先係重點！」
記者會的火花場面引來網民熱烈討論，紛紛表示對新劇情走向十分期待。有網民留言力撐熟齡組：「婉婉同三太（樊亦敏）扮女僕太有驚喜！薑越老越辣！」、「Yuki同Jenny好可愛，但都係想睇熟女組多啲，一定好好笑！」亦有網民大讚Duncan的反應：「Duncan個反應笑死，『擘大眼同闔埋眼冇分別』呢句識講嘢！」、「好期待女僕Café條線，終於有新嘢睇！」、「車婉婉爆seed反擊勁真實，撐你！」
