女神配對計劃 2｜Oscar突轉軚Roxanne被轟渣男！本人親解心結阿Bob力撐爆剪接內幕

Oscar突轉選擇被全網鬧爆渣男

節目播出後，Oscar的社交平台即時被網民攻陷，事關他在節目中原本一直對俞可程 Kanis表現出極大興趣，二人互動甜蜜，被視為有望成功配對的一對。豈料畫風一轉，Oscar突然將心意轉向另一位女神何沛珈 Roxanne，這個180度大轉變讓許多支持「Oscar-Kanis」配的觀眾大感錯愕，隨即引發巨大爭議，不少網民湧入留言區，直斥Oscar的行為是「渣男表現」，批評他對感情不認真，傷害了Kanis。

Oscar首度回應爭議：我需要忠於自己

面對坊間的「渣男」指控，Oscar坦言感到少許不開心，但在主持人阿Bob的追問下，他亦大方剖白自己當時的心路歷程，解釋轉變選擇的原因。Oscar表示：「我覺得我係需要了解一個人深咗，先可以做一個決定。」他透露自己收到大量網民的私訊，勸他不要改變選擇，但他認為必須誠實面對自己的內心，「呢個（轉選擇）係我跟從自己內心，我知道好多人一開頭對我揀 Kanis 好支持，我都收到好多 DM 叫我千祈唔好轉人，但我覺得最終我都係要忠於自己意願，咁先係真正嘅我。」

監製阿Bob齊力撐驚爆剪接時間差內幕

對於Oscar被標籤為渣男，主持人阿Bob及監製Manho均開腔力撐。阿Bob激動反問：「了解咗覺得唔係嗰個 vibe，想轉（選擇）就係渣男？咁我諗地球上好多男人都係渣男嚟喎！」他解釋，觀眾看似漫長的相處過程，其實拍攝時間極短，「大家唔好以為（佢哋）感情好深厚，大型水上樂園、五角枱（嘅拍攝）都係一日半日嘅事。」監製Manho亦補充，節目剪接會造成時間上的錯覺：「有時佢哋見一日我哋剪成兩集，變相觀眾視覺會覺得係幾個星期，但其實可能佢哋只係見過兩、三次。」他們呼籲觀眾不要惡意攻擊，並預告後續將有更多意想不到的發展。

網民反應兩極：有人撐有人鬧

事件引發網民熱烈討論，意見呈現兩極化。有支持Oscar的網民認為：「真人騷啫，唔啱咪轉囉，人之常情。」、「剪接效果放大咗啦，其實佢哋先識咗幾日，忠於自己冇錯。」、「支持Oscar，好過夾硬一齊呃自己呃人。」但另一派網民則完全不接受，狠批：「講到尾咪又係見一個愛一個，Kanis好慘。」、「一開始又揀人，轉頭又話唔啱vibe，好冇風度。」、「根本就係渣男行為，唔使解釋咁多。」