OG2

小心整形變成狐狸臉!6位小三女星面相大公開

擁有明星面相係唔少女士嘅夢想,國內整形醫院成日會用明星效應做賣點,為客人提供「女星同款方案」,不過「女星相」中,有啲被喻為標準嘅眼、耳、口、鼻,面相學嚟講反而係「小三面相」,如果唔想整錯容誤入歧途,破壞人哋家庭幸福,就要留意以下6個小三面相要點。

撰文:CM Team |圖片:網上圖片


黃心穎 圓眼水汪汪 眼頭向下傾

2019年做「小三」做到出晒位,一定係「安心偷食」嘅黃心穎,4月16號爆出一段黃心穎同許志安車內纏綿16分鐘嘅片段,兩人形象瞬間插水,之後黃心穎被大台放入雪櫃,要飛去美國讀書避風頭。面相嚟講,黃心穎嘅眼形鉤狀彎曲,眼頭向下傾。擁有呢種「狐狸眼」嘅女人,為人奸狡、無情無義而且好色。
袁詠儀 眼肚有紋

性格爽直嘅袁詠儀,曾經喺節目中自爆同有婦之夫交往過,佢提到自己當時年少不知,又貪慕虛榮所以被包養,但後來覺得好後悔同覺得對Chi Lam (張智霖)唔住,表示非常後悔。眼肚有紋(桃花紋)嘅女人,對於感情非常主動,只要鎖定對象就唔會輕易放手。

林憶蓮 面大鼻細

歌手林憶蓮因為工作關係,認識到音樂教父李宗盛,兩人志同道合打得火熱,但當時男方已經有家室,正印成功用「細路唔可以無爸爸」煽情招數勸退林憶蓮,之後林憶蓮更移民加拿大。但李宗盛決定同正印離婚,追去加拿大同林憶蓮再續未了情,1998年仲結婚生埋仔,但2004年都係離婚收場。林憶蓮鼻樑挺正,鼻頭尖圓,不過面大鼻細,屬於典型「二奶鼻」,呢種女人天生缺乏安全感,鍾意搵年紀大、事業有成男士做對象,大多數都係有家室男士。
Mandy Lieu 瓜子臉

史上最強小三非Mandy Lieu莫屬,踏上洗米華經常高調放閃,2015年更幫洗米華生咗個女,成日同洗米嫂爭風呷醋,「小三協會會長」個名實至名歸。Mandy Lieu擁有一副超尖瓜子臉,呢個面相反映性格貪慕虛榮,但晚年無咩福氣。

吳綺莉 鼻樑起節

1999年吳綺莉被指介入成龍與林鳳嬌嘅婚姻,做咗第三者,同年10月吳綺莉被爆懷有「龍種」,雖然成龍唔認經手人係自已,但佢承認犯咗「天下男人都會犯的錯」。鼻樑起節嘅女人佔有慾相當強,自私又偏執,為咗自己擁有渴望嘅愛情,做小三都甘心命抵。
關之琳 顴骨高

介入有米富商馬清偉婚姻嘅關之琳,因為當時搞到正印陳美琪流產,被標籤做「拜金二奶」!清秀外貌中可以發現佢嘅顴骨幾高,呢種人令男人有種「無手尾跟」嘅感覺,但呢種人好追求權力,視搶人老公為「成就」,係非一般小三!