OG2

腋下打針可趕絕臭味!必看3大免開刀除臭狐方法

夏天一嚟,返工放工逼喺人多嘅地方,經常會傳嚟一陣臭狐味,感覺真係唔好受。加上香港天氣濕熱,汗液好易成為細菌嘅養分,令身體發出異味。想改善臭狐問題,除咗傳統嘅「割汗腺」之外,仲有其他無痛方法可以幫到手!

撰文:CM Team| 圖片來源:pinterest

其實有臭狐都無人想,以下4大臭狐成因睇下你避唔避到~
家族遺傳

有外國研究顯示,如果父母都有臭狐,有8成機會傳俾下一代;如果是但一方有腋臭問題,子女都有5成機會有同樣問題,遺傳機率相當高。

汗腺發達

有啲人天生汗腺發達,氣溫高低都會容易出汗,而且手腳、身體其他部位都會頓頓出汗,呢啲先天因素變成細菌溫床,如果個人清潔做唔足,好易演變成為臭狐。

情緒困擾

經常情緒波動都會刺激汗腺分泌旺盛,加上情緒會影響荷爾蒙分泌失調,分泌物同真菌更容易加重體味。

多肉飲食

經常大魚大肉,口味偏重嘅人體質P.H.值屬酸性,生陳代謝時會令汗液同步變成酸性,所以「食肉獸」都係患臭狐嘅高危人士。

有啲成因真係避無可避,如果有得揀都唔想被遺傳到有臭狐,不過又唔使灰心,睇睇以下方法,都有機會從此令臭味消失㗎~
方法一 激光脫毛

腋下嘅毛髮經常係細菌嘅溫床,想改善臭狐,維持腋下乾爽係比較溫和嘅方法,透過激光脫毛療程,患者除咗可以減少汗味,仲可以同步令腋下肌膚更緊緻,但如果係因為汗腺發達或荷爾蒙分泌失調所導致嘅臭狐,就唔會有太大幫助。

方法二 注射肉毒桿菌

除咗瘦面抗皺之外,肉毒桿菌仲可以治療臭狐。原理係利用肉毒桿菌去抑制汗腺嘅交感神經,停止汗腺分泌一種名為「乙酰膽鹼」嘅物質,簡單嚟講即係令汗腺縮細,唔再大量排出汗水。打咗肉毒桿菌嘅患者,5-6日後會發現腋下會比以前乾爽,異味亦會漸漸消失,但注射肉毒桿菌唔係永久性,一次注射藥力大概可以維持半年,視乎個人體質。

方法三 微波療法截斷汗腺

早年開始普及嘅「微波治療」,同樣係無需開刀、留疤嘅新方法,原理透過發射微波嘅熱能能量,將皮下嘅大汗腺截斷,好似用微波爐「叮死」汗腺同頂漿腺咁。一般療程最少做兩次就有效,每次約1.5萬-2萬元,可以將「臭狐」問題根治之餘,同時減少腋下毛髮生長數量,最大優勢係呢種療程可以做到「永久性」功效,一世唔洗再做狐仙。

都係果句,以上內容只作參考,做任何療程都要搵專業可靠,甚至有認證執照的治療師或醫生問清楚喔。另外,進行美容注射時,都要了解多d安全及風險呀。

關鍵詞
臭狐打針