OG2

貪懶出事!戴隱形眼鏡沖涼搞到失明

據英國《太陽報》報道,英國有一名男子尼克因為貪方便,而戴隱形眼鏡洗澡而出現視力模糊,原來已經受到寄生蟲感染,結果兩個月後更惡化至右眼失去視力。尼克已進行2次手術,依家正等待角膜移植。有眼科專科醫生表示,隱形眼鏡有機會會吸附水中細菌或微生物,如果唔做好清潔,好易會導致眼睛發炎,所以不太建議戴隱形眼鏡沖涼甚至游水。
撰文:CM Team| 圖片來源:網上圖片


尼克由4歲開始戴眼鏡,二十多歲因為投身足球運動,而決定換上隱形眼鏡,點知有日佢戴上隱形眼鏡後,打算到健身房做運動:「當時甚麼都沒想,就到淋浴間洗澡。」

慢慢佢開始發現右眼視力模糊,以為係戴鏡片戴得唔好,「之後數天,我滴了眼藥水,並將手機與電腦螢幕設置到最低亮度,好像還可以。」

但隨著情況變得愈來愈嚴重,揾視光師查詢,視光師檢查到尼克眼睛有潰瘍跡象,建議立即去醫院做詳細檢查,化驗後證實感染棘變形蟲角膜炎(Acanthamoeba keratitis)。

6大棘阿米巴角膜炎症狀

  1. 畏光
  2. 視力模糊
  3. 眼部疼痛
  4. 眼紅
  5. 異物感
  6. 劇烈頭痛

過往有相關案例要將整個眼球割除,令尼克擔心不已。期間尼克使用抗感染眼藥水,起初以為情況好轉,但過兩個月,於開車上班途中,右眼突然完全失明。
現時尼克已完成角膜膠原交聯手術(Corneal Collagen Cross-linking)及羊膜移植手術,並需要繼續接受治療:「從來無人告訴我不可以戴隱形眼鏡洗澡,包裝上沒有註明,視光師亦沒有提到有風險。我因為戴上隱形眼鏡沖涼而失去18個月的人生。」


其實有唔少眼科醫生都唔建議戴隱形眼鏡沖涼或游水,棘阿米巴角膜炎係一種由阿米巴變形蟲引起的角膜感染,呢種變形蟲可能會於湖水、泳池、浴缸,甚至是飲用水出現。嚴重可導致患者喪失視力或失明。隱形眼鏡亦可能會吸附水中細菌或微生物,導致眼睛發炎,而且沖涼時用嘅沐浴露同洗頭水如果不慎黏在鏡片,亦會對眼睛造成刺激。所以大家都係唔好貪一時之快,沖涼或游水,都係除咗副con先比較安全呀。