翹唇

原來顯老係睇嘴唇! 外國新興變淘氣翹唇

Channel May

廣告

外國不嬲流行打針豐唇,令雙唇變性感嘟嘴,係咪就真係性感見仁見智,但最近呢個整容潮流隨著年代嘅轉變有減退迹象,取而代之係「lip lift」,做咗係會令上唇微微翹起,稍稍露出門牙。

撰文:CM Team|圖片:網上圖片、Angelina Jolie instagram

咁樣整容有咩好處?原來會睇落後生啲㗎!據外國整容醫生Randal Haworth所講,當人老咗,上唇會越嚟越長,遮住上顎牙齒。

而同一時間下唇會縮,露出下顎啲牙,情況等同女人嘅胸部下墜。唔信嘅可以留意返Angelina Jolie,19歲時嘅佢少少露齒,個面相真係青春可人啲㗎,雖然宜家嘅Angelina Jolie個唇都係咁豐滿,但對比之前已經有好大分別喇!

另一明星Jane Fonda都係咁,好明顯見到嘴形嘅分別同之前大不同。

另外有牙醫提醒,上顎露齒2毫米就係最靚嘞。

咁個手術係點做呢?好似以前咁整性感香腸嘴咁注射填充劑係唔得㗎喇,因為咁樣無辦法去改變唇形,真正要做嘅其實係喺鼻下面嘅組織動手腳,令上唇變翹。整個過程只要 30分鐘。

但係呢個手術會有留疤嘅風險,一大截疤痕會收入鼻孔裡面,但點都難免有一丁點喺鼻翼見到,而且如果手術失敗嘅話,鼻孔會變形㗎!美國富貴地段比華利山嘅整容醫生Leif Rogers就話,佢會非常小心篩選客戶,因為翹唇手術真唔係人人啱做,但即使佢咁揀擇,舊年做過嘅同類手術宗數都火箭式勁升三倍。
原來大家真係天不怕地不怕,最怕係顯老!