思家大戰｜大姑丈獻唱一曲 炎明熹甘拜下風爆金句：我以後都唔使唱歌喇
廣告
由李思捷主持的《思家大戰》周日晚（16 日）最新一集，有張振朗率領的「靈戲逼人」隊，成員包括龔嘉欣、劉穎鏇、江欣燕和阮嘉敏，對戰由 Gigi 炎明熹大姑丈率領的「Gi 朋戚友」隊，成員有細表哥細 Y、表姐兼炎明熹後援會會長 JY、表哥大 Y 和細姑丈 Arwick。炎明熹雖然冇份玩，但都有在場搞氣氛！
Gigi 又晒火星話：大家都加油，我無話可說
今集氣氛熱鬧，「靈戲逼人」隊一班女隊員抬住振朗出場，相當架勢。談及熱播劇《靈戲逼人》，振朗應思捷要求預告劇情並驚爆：「丁一駿（其角色名）同女鬼好好感情，之後嘅劇情有機會係人同隻鬼生 BB！」在旁的嘉欣聽畢忍不住吓了一聲，到底孰真孰假？「Gi 朋戚友」隊則獲 Gigi 親臨現場支持打氣，戴着口罩的Gigi 大晒招牌火星話：「大家都加油，我無話可說！」
Gigi 尷尬稱：我以後都唔使唱歌喇
思捷問到有冇貼士畀大姑丈，Gigi 再晒搞笑功說：「唔好咁緊張，今日你做 Gigi。」之後大姑丈應思捷要求即場高歌，大姑丈獻唱 Gigi 的《好想約你》，Gigi 聽後再放笑彈：「我以後都唔使唱歌喇，好勁呀！」李思捷聽完都忍唔住爆笑。
龔嘉欣化身女鬼嚇思捷
問答環節氣氛同樣熾熱，龔嘉欣上台搶答問題時、化身《靈戲逼人》的女鬼雲柳芳，更鬼馬地匿在思捷身後嚇他，大晒可愛萌爆面。「靈戲逼人」隊全晚表現Hyper，每答對一條問題均會又跳又叫，分貝爆錶，就連站在遠處的思捷亦坦言感到地面震動，認真誇張。而在最後的「終極開口中」，今集有人在第一 Round已拎到 182 分超高分數，表現非常亮眼。
圖片來源：（圖片來源：TVB）
