羅密歐與祝英台｜古佩玲初戀甜蜜加持女神光 為劇獻出3個第一次

昨晚（24 日）一集聚焦在祝英台（陳茵媺飾）與梁山伯（陳豪飾）20 年前相遇相愛的時間點，二人年青版分別由古佩玲（Kelly）及李爾晨（Kyle）飾演。有婚約在身的英台，一次意外與山伯邂逅，經過多番相處，山伯利用「水管大廈」的獨特設計向英台示愛，二人終墮愛河。但因身世懸殊，祝英台媽咪（馬海倫飾）遂出手要山伯知難而退，反而令二人愛得更堅定並相約私奔。就在私奔前夕，殺手殺入祝家殺死祝英台爸爸（煒烈飾）及英喬（古佩玲分飾），為了祝家著想，英台臨危授命喬裝哥哥英喬打理祝家業務，「梁祝」之戀煞停…昨晚結尾一幕，英台（陳茵媺飾）與山伯（陳豪飾）再以與年青時同樣的方式在天台意外相擁兼跌倒地上，梁祝戀相隔廿載後似乎得以延續…

昨晚佔戲甚重的 Kelly，不僅以古典味十足的長鬈髮、配以多款少女味濃的洋裝上陣；每當涉及「少女心事」場口，畫面鏡頭不但格外唯美，Kelly 身後更會出現「女神光」，配以 Kelly 無時無刻甜到漏的笑容、及一雙水汪汪的腰果眼，滲出陣陣粉紅初戀氛圍。Kelly 劇中與陳茵媺一樣要一人分飾兩角英台及英喬，更要梳all back、著西裝兼壓低聲線分飾男兒身。首次一人分飾兩角的 Kelly，無論男裝或女兒身均大獲網民正評：「古佩玲扮男裝仲靚」、「帥氣」、「好似千金小姐」、「演技喺新生代花旦中算好」。

Kelly 受訪時笑言為劇集付出不少第一次，包括拍動作戲、一人分飾兩角及拍悲情戲。談到英喬與英台同時遭殺手入屋狙擊一幕，Kelly 笑言有難度：「因為係同時拍，我又要好型、型完又要即刻喊，個情緒係比較難捉。」談到英台不少場口畫面均很唯美，Kelly 感恩幕後同事付出不少心思：「好似我攞住件衫喺屋企跳舞嗰場，真係度咗幾次角度同埋係咁練轉圈，就係想件事再靚啲。」又謂沒想到連拍靜態的寫日記場口也滿是壓力：「本日記我真係一個字一個字咁抄落去，唔可以寫錯之餘，又驚啲字跡唔靚。」

感激 Kelly 予以鼓勵

另年青版山伯 Kyle 亦收獲好評，昨晚在出浴場口大晒強勁胸肌、麒麟臂及側腰肌肉線條的他，除了笑容充滿陽光氣息，身形更是弗到漏油，獲讚顏值高兼身形Keep 得好。談到出浴場口，Kyle 坦言只記得很冷：「拍沖涼嘅時候已經（清晨）五、六點，個廠啲冷氣好凍，仲要沖凍水。嗰場戲凍到口都震埋，講對白都 Ng咗好多次。」反而拍攝打鬥戲當日則又早又熱：「但我要著皮褸上陣，淨係記得好熱。」Kyle 又笑言談情場口其實很難：「我圍讀時好唔得，啲對白對於我有啲尷尬，因為我唔係好慣講啲咁深情嘅嘢，好彩 Kelly 好就得人，畀好多鼓勵

我。」他指由於不懂得吹口琴，故拍攝時笑料連場：「出嚟啲聲好古怪，但我個樣又要好深情喎，搞到 Kelly 係咁焗蟹。」