馬時亨香港情｜陶大宇曾與歐陽震華投資飲食業分錢時尷尬餐廳共渡時艱
由馬時亨主持的訪談式綜藝節目《信和集團呈獻：馬時亨香港情》，昨（17 日）晚九點半翡翠台播出最後一集，馬時亨與嘉賓曾志偉及「師奶殺手」陶大宇講飲講食之餘，並大談生意經。
大宇歐陽震華合資開餐廳只為一件事
因拍攝劇集《茶煲世家》與歐陽震華結緣成為好友的大宇，當年曾與對方夾份開餐廳，原因更是相當簡單：「藝人都要搵地方食飯，咁嗰時一有咩事、一有咩想食就話返公司，個聚腳點好緊要，維繫到感情。」大宇又感嘆沾手過飲食業後，便明白到親力親為的重要性，更曾因自己參與度不足大感慚愧：「你哋有冇聽過分錢都會覺得唔好意思架？我做又冇份做喎，又唔係成日返公司，但每年分錢我就一定到嘅。」至於曾投資壽司餐廳的馬時亨，當年則因租金問題沒法走下去，馬時亨說：「股東話：『咁樣加（租）落去係同業主打工咋喎，咁賣咗佢算喇。』咁（當時）收購我哋間公司就大財團，佢攞到啲舖係平嘅，佢咪做到落去咯。」志偉獨門經營餐廳理想模式
此時志偉緊接：「所以要將生意變為兩樣嘢，做餐廳同埋物業投資。」並分享自己認為經營餐廳的理想模式：「做餐廳最好夾份嗰時、大家有能力就買舖，哪怕你淨係夠畀首期，每個月月供就當畀租。如果你間餐廳做到八年、十年，打個和冇得頂，係蝕咗喺租架啫。但如果係買（舖）就賺咗間舖，會升值架嘛，唔使畀人加租。」大宇聞言亦無奈和應：「香港飲食界係好辛苦。」熱心的志偉更公開呼籲業主「延緩加租」，志偉說：「希望大家要諒解，先至有得共存。」
餐廳名古靈精怪誤導洪金寶
志偉又指當年之所以投資飲食業，全因一次與好友譚詠麟飲茶時，對方提起自己將會與友人合資飲食生意，當時志偉第一反應是：「搞錯！我同你兩兄弟，做生意唔帶挈吓我？」之後二人促成合作，志偉笑指難忘開張當日現場擠滿藝人，每個人的指定對白也是：「搞錯！開餐廳都唔預我？」志偉指之後與約 60 人夾份開了「天天漁港」，其間更曾因改名太「古靈精怪」誤導了洪金寶：「你知我哋頑皮，天天漁港英文叫咩好？就 Daily Seafood 啦，嗰時我哋有個新 concept，就係啲
海鮮價似足機場啲航班一路跳，幾錢斤、幾錢斤咁，於是我哋就改咗 Daily
Seafood Supermarket。跟住洪金寶打嚟：『你又話開餐廳嘅？原來開 Supermarket？
點解開喺四樓？』朋友係講個信字，唔過問嘅，交咗錢，做咩生意都未知。」
