「萬人迷」碧咸挾美斯來港分享成功秘訣靠持之以恆蘇亞雷斯踢港隊前喪…

由碧咸做班主、阿根廷「球王」美斯領軍嘅美職球隊國際邁阿密，後日喺香港大球場同香港聯賽選手隊上演表演賽。「萬人迷」咸爺今日一落機即刻出席私人品牌發佈會，同盈科拓展集團主席李澤楷先生齊齊慶賀富衛保險全新品牌FWD Private正式面世。向來親民嘅咸爺仲不時向在場人士揮手問好，又化身「碧大仙」同賓客合照，恍如舉行球迷見面會，high到爆！

由擁有「黃金右腳」嘅球星轉型到美職球隊國際邁亞密嘅班主，碧咸大方分享成功秘訣「堅持係成功嘅不二法門，只要對自己熱愛嘅事持之以恆，就可以跨過人生路途上嘅所有障礙同挫折！」成功男人背後嘅女人都好重要嘅，佢仲特別多謝太太Victoria同仔女無條件嘅愛同支持，「我一直重視與家人共敍天倫的美好時光，就算工作再忙碌，只要球季結束，我便會跟家人四出旅行。」

至於國際邁阿密今日約2點半坐私人飛機抵港，之後直接坐車入住香港仔富麗敦海洋公園酒店，吸引半百名球迷守候酒店門外，求簽名！

賽前記者會喺晚上6點半舉行，數百名中外傳媒塞爆會場，會場核心外圍亦有過百名球員死守，場面勁墟冚！教練馬天奴、球員蘇亞雷斯做代表出席，馬天奴主力回答有關球隊備戰、新球季嘅問題，相信球迷最關注嘅就係有傷在身嘅美斯會唔會落場？馬天奴坦言美斯個身體狀況的確要再評估，等聽日訓練再睇佢嘅情況，但盡量會安排佢落場踢得幾多得幾多，有教練嘅呢番說話，球迷放心晒啦！

而首次嚟香港嘅蘇亞雷斯就大讚香港夜景好靚，講到加盟國際邁阿密，佢話事前都有好多唔同嘅考量，但能夠同死黨美斯再做戰友，簡直係夢想成真！另外蘇亞雷斯喺記者會上不停咁咬手指，睇嚟佢真係好鍾意咬嘢！

訂閱 Viu1HK YouTube Channel: https://bit.ly/3lYFNLW

觀看更多精彩內容：https://www.viu.com