Jeffrey出「三歌」首挑戰J-Rock感覺好爽得日本猛人渡辺省二郎幫混…

好勁呀，Jeffrey魏浚笙推出第四首歌《Never Say Never》啦，勁在咩啦，勁在佢今次走咗去東京取景拍咗個堅持熱血追夢MV，仲搵到日本混血女神藤井莉娜久休復出助陣做MV女主角添！其實呢首歌都係廣告主題曲，事關Jeffrey擔任譚仔三哥15周年代言人，呢首歌就係譚仔三哥15周年主題曲，所以首歌別名「三歌」，真鬼馬！

作為譚仔三哥15周年代言人嘅Jeffrey，首度挑戰J-Rock，呢首「三歌」《Never Say Never》係由Edward Chan監製 ，搵嚟Anson Chan創作J-Rock曲風；再由「貼地填詞人」梁栢堅寫咗個熱血追夢故事嘅歌詞，而Edward仲特別搵嚟日藉混音大師渡辺省二郎先生做混音。渡邊先生曾幫星野源、 濱崎涉、Puffy 以及一系列日本YouTube頻道「THE FIRST TAKE」 內嘅單曲做混音，來頭好勁架！

而Jeffrey就話佢要靠「堅持辣著」呢個信念，以堅持同毅力先駕馭到J-Rock曲風，亦即係同譚仔三哥15周年廣告主題不謀而合，佢話「之前未試過唱J-Rock曲風，原本以為同讀9聲嘅廣東話唔太襯，估唔到都好有化學作用，錄音時感覺好爽，我尤其鍾意第一句歌詞『發夢要繼續去，繼續我熱情』，完全講出我對出歌嘅堅持，對追夢嘅執著，越唱越有共鳴，同樣希望大家越聽越有共鳴，一齊堅持追夢，永不放棄，Never Say Never！」

至於MV，Jeffrey化身喺日本追夢嘅漫畫家，一個人喺他鄉「捱鹹苦」打拚，但依然堅持靠雙手畫出彩虹。顏值零死角嘅Jeffrey，換上多個靚仔造型，加上日本殿堂級混血名模Fujii Lena藤井莉娜助陣，令呢個MV變成「顏值天花板」MV！現年39歲嘅藤井莉娜曾經係日本雜誌首席模特兒，雖然已榮升人母，但外貌同身材都KEEP得好，Jeffrey都話可以合作簡直係成就解鎖「最驚喜是可以見到兩位日本藝人，細個時經常喺時裝雜誌見到藤井莉娜，今次見真人，感覺好有趣，雖然大家語言不通，但一拍即合，有種『神交』嘅感覺，意思係眼神交流啫，所以合作愉快，獲益良多！」講到佢喺MV中被藤井莉娜「彈鐘」後，走去新宿食米線當自我安慰，Jeffery坦言現實中同樣會喺遇到唔順心時，走去食米線當打氣喎！

訂閱 Viu1HK YouTube Channel: https://bit.ly/3lYFNLW

觀看更多精彩內容：https://www.viu.com