鍾培生再派花生 邀劉馬車 龍心打擂台 周永恆獄中住單人倉 稱食物難啃…

鍾培生、霍哥同啱啱放監嘅周永恆今日現身記者會，宣布《培生擂台無敵盃2023》喺12月1舉行，同時加碼搵咗劉馬車同龍心上演另一場拳賽。

今次拳賽可以話一地花生，4個選手有3個都有犯案前科或涉案紀錄，周永恆早排因「抗拒執行職責的警務人員」同「襲擊執行職責的警務人員」被判即時入獄兩星期。劉馬車亦曾因「襲擊」市民而被判入獄六星期。龍心就喺上個月俾廉署落案起訴，涉企圖欺詐3萬蚊選舉開支，但案件押後11月10日再訊。

唔知係咪坐完監撳熄咗道怒火，今日喺Face Off環節，周永恆冇撩霍哥隻揪，而劉馬車同龍心就只係除衫鬥大隻，同樣冇咩火藥味。

周永恆受訪分享獄中生活，話食物同屎一樣，肉都冇多嚿！咁有冇同倉友衝突先？佢話受保護住單人倉，每日睇書包括倚天屠龍記小說。問佢夠唔夠膽再犯事？周永恆話凡事都有第一次。而霍哥話非常認真對待拳賽，每星期練拳5日再跑步、游水，為咗體力連煙都戒埋，不過開頭唔慣，喺街索路人二手煙頂癮，笑Cry！佢話目標係4分鐘內K.O周永恆，希望對方唔好出陰招打佢春袋。霍哥又話目前專心練習，亦冇同微辣嘅六毫子、加蔥聯絡。想知更多？記得入嚟睇片啦！

訂閱 Viu1HK YouTube Channel: https://bit.ly/3lYFNLW

觀看更多精彩內容：https://www.viu.com