Ian秘密練兵首度成跳唱擔當 拍《夜視鏡》MV喪跳6粒鐘送Hellosss驚…

Ian@MIRROR今年最後一首節拍強勁嘅唱作作品《夜視鏡》，自推出以嚟都有唔少Hellosss估Ian會以跳唱姿態登場，不過MV一直未見蹤影，令大家一度以為估錯方向！但實情係陳仔秘密練兵，喺《夜視鏡》MV入面首度成為跳唱擔當，大騷舞技，一切謎底已經解開！

Ian一直對於跳唱一事故弄玄虛，目的就係想畀Hellosss一個驚喜「初初《夜視鏡》出咗街，大家聽到一個節拍比較強勁嘅歌曲嗰陣，大家唔知邊度聽番嚟話係跳唱歌，但我冇講過話係跳唱歌，亦都冇講過話唔係跳唱歌，不過依家出咗MV，大家就知係跳唱歌啦！」陳仔認真鬼馬！

為咗今次嘅MV，Ian喺拍攝前瘋狂練舞「導演想畀好多跳舞位我表現自己，所以除咗Group Dance，仲有一啲跳舞嘅場面，個MV淨係拍跳舞都拍咗6個鐘冇停過。多謝佢畀呢個機會我，雖然跳到好攰但都OK，最緊要出嚟好睇，大家鍾意就好！」由於拍攝時間都幾長，身邊工作人員狂隊朱古力同糖果畀Ian以補充體力，而陳仔就幽默自嘲只係天生面青口唇白「皮膚比較白，咀又冇乜色，但係體能OK！」

呢次surprise咁成功，相信Hellosss希望會繼續見到「跳舞賢」，但陳仔竟然話短期內都可能唔會出跳舞歌，只可能係相同曲風有機會再出，咁樣嘅話班Hellosss會好sad喎！咪住先，Ian未講完嘅，佢話係咪跳舞都要再睇情況「睇吓今次出咗MV個反應先，睇吓大家係咪真係好鍾意睇再決定係咪跳舞，如果大家鍾意睇嘅話就好值得，我唔會抹殺任何嘅可能性！」Hellosss快啲loop爆個MV同埋呢個啦！

網民點睇？

夜視鏡好好聽,跳舞又好好睇呀,IAN 加油🎉😂❤😊💪🙏✌️

訂閱 Viu1HK YouTube Channel: https://bit.ly/3lYFNLW

觀看更多精彩內容：https://www.viu.com