Jer年尾出壓軸solo歌為柳柳粉打氣MV化身「破爛」天使 提點莫忘初衷…

Jer@MIRROR推出2023年壓軸派台作品《大海少年》，由「樹妮妮」Serrini、Him Hui@The Hertz作曲，小克填詞，用溫暖為柳柳粉帶嚟力量同希望，係一首窩心嘅打氣歌！Jer指一直以嚟都想做一首有力量嘅歌「Serrini好似一個媽媽，會教育佢嘅Fans一啲道理，佢嘅歌亦陪伴我渡過一啲唔開心嘅日子，聽完即刻多好多力量，依家搵到佢寫，成件事好巧合。」

喺MV中，Jer化身成天使登場，喺「失業漢」Ronald林子傑感到絕望之時，溫柔提點打算輕生嘅佢莫忘初衷「爸爸（林耀聲飾演）同細個嘅佢（黃梓樂飾演）玩帆船，其實係想教識佢乘風破浪嘅道理，希望佢長大之後，唔會因為生活上嘅一啲唔順利而放棄。」雖然話係天使，但Jer喺MV入面嘅破爛西裝造型十分獨特，值得細心留意！

除咗推出新歌《大海少年〉之外，Jer亦宣布個人專輯《I am the I》面世啦！不過今次Jer淨係出黑膠碟「出黑膠碟係由細到大嘅夢想，細細個已經覺得除咗聽之外，黑膠嘅封套、裡面嘅內容，都係超值得珍藏！」今次黑膠碟亦特別推出兩個版本，封面均由小克繪畫，畫作裡面隱藏唔少同MV有關嘅秘密！對成為首位MIRROR成員出大碟，Jer謙稱出碟唔係一件容易嘅事「身為歌手，要出一隻碟，畀自己同Fans去珍藏，呢個project已經plan咗成年，今日終於出到，正呀！太開心！」

訂閱 Viu1HK YouTube Channel: https://bit.ly/3lYFNLW

觀看更多精彩內容：https://www.viu.com