李璧琦

李璧琦撕破闊太面具 拍拖慳住使

邊個話劇集排到星期日播出就一定係唔好彩變炮灰?《三個女人一個「因」》因為黃智雯演技出色一人分飾三角收視報捷,更順手跑出個色誘陳智燊入型入格的李璧琦!邊個話明珠台主持就個個鬼聲鬼氣離晒地?原來無綫御用闊太李璧琦都唔係下下扮上等人,平時跟住男友拍拖遊街,一樣都係食牛腩河、行outlet,闊太背後都可以好貼地!

撰文:東方新地|圖片:新傳媒圖片庫

李璧琦 拍拖60蚊有找

八級鋼琴、浸大聲樂系畢業、《星夢傳奇》揀唱歌劇,一入大台仲因為英文流利成為堅離地明珠台節目《港生活港享受》同《Dolce Vita》做主持,李璧琦高質離地氣質因此深入民心,連轉入戲劇組都被監製當係御用闊太或高學歷強人。原來gel甲飲紅酒食西餐蒲中環都係劇情需要,鏡頭背後,李璧琦都識得捐窿捐罅搵平民美食同平嘢買!

李璧琦
拍親劇角色都係闊太或女強人,李璧琦在新劇《三個女人一個「因」》又係做進攻型艷婦,多次主動色誘男主角陳智燊。

平食面珠

日前不用拍劇又毋須為新劇宣傳,李璧琦與拍拖三年圈外男友齊齊過海搵食。無工作在身自然無謂趕頭趕命,二人他他條條傍晚才由日出康城住所出發,不施脂粉去到有「太安夜市」之稱的西灣河太安樓覓食。識得偷雞泊架車在太安樓外油站旁、又識搵蚊型牛腩名店醫肚,一睇就知二人熟晒架步。

李璧琦
專做明珠台高質生活節目主持、專攻劇集高竇靚太角色,李璧琦私底下其實好貼地,同圈外男友Adrian愛在平民區西灣河、觀塘拍拖。
李璧琦
主持節目專講high-tea、紅酒同名錶,現實中的李璧琦同男朋友拍拖,係去平民美食基地太安樓食牛腩粉。
李璧琦
兩位一人一碗粉、連飲品都唔見叫番杯,唔使半個鐘已經醫飽肚,神色滿足離開食店。
李璧琦
位於西灣河太安樓的群記細細間,座位不超過十個。不過出名平靚正,鎮店之寶牛面珠墩河一碗都係30大元。

唔使半個鐘、未夠七點已經食完個早飯,由男友駕車才返回九龍東,原來唔係返歸又唔係行名店,而係去到outlet林立的觀塘駱駝漆大廈掃平嘢。幕前高竇、幕後貼地原來都唔係女藝人百變本色,最神乎其技都係食完粉仲係黃面未瞓醒街坊樣、過完條東隧李璧琦已經搵番啲眼耳口鼻化完個靚妝,變形快過變形金剛!

李璧琦
未夠七點已經食完個晚飯上男友座駕離場,平時出鏡例必濃妝艷抹,所以素顏李璧琦當日現身西灣河幾乎完全沒有街坊認得出。
李璧琦
平食完個河粉過海繼續平遊觀塘,李璧琦同男友分頭行事,一個行時裝店outlet,一個就入體育用品散貨場。
李璧琦
唔知係唔係行完一轉都搵唔到心頭好,李璧琦見番男友時扁晒嘴齊齊返 歸,一對拖友是日節目夠晒慳。

唔安份的女人

39歲的李𤩹琦在《三個女人一個「因」》多次色誘陳智燊,又企圖謀殺親夫。次次演親唔止係上等人,仲要係唔安份的女人,無論演高薪厚職的專業人士定係有米少奶奶,都唔安份地去勾佬。

 

延伸閱讀:

古天樂首奪影帝 多年來低調行善 內地建逾百學校