維園花市呃like萌物推介
一年一度花市昨日開鑼！由2月2日至8日的大年初一凌晨結束，年近歲晚，和至親愛人齊齊行花市如行大運，接收好運過新春，《新地》網為你帶來全城最旺的維園花市直擊，發現今年有唔少呃like新玩意、食物方面選擇亦甚多，價錢一目了然，向目標進發，買番樣心水玩意過新年。
No. 1萌物 層層疊雪糕
巨型雪糕cushion，雪糕筒旁有拉鏈可放小物，雪糕位置可以玩層層疊加幾多層都得(當然要加錢啦！)而雪糕上可自由選擇併合英文字母豆豆及布牌仔。
冧女一流！拼番個I Love You新年即刻有女朋友仔帶返屋企威威！
價錢：
雪糕茼連一球雪糕 $168
每加一層加：$68(多三粒字母及一個布牌)
位置：No.223攤檔
No. 2萌物 治癒系雞髀
超過三呎高巨型雞髀攬枕，攬住又得、夾住又得，凍冰冰即刻變暖笠笠！屬短毛質地，毛質順滑唔鞋手。
價錢：
大雞髀攬枕 $288
細雞髀攬枕 $88
位置：No.188攤位
No.3萌物 「熊」運當頭被
拉開熊仔頭，內藏順滑短毛質地被仔，收藏後可當背墊攬枕，確係唔錯選擇。
價錢：$128
位置：No.21攤檔
No.4萌物 萌萌豬攬枕
雖然猴年將至，但有攤檔以賣「豬仔」突圍，豬仔攬枕有精緻繡花圖案，豬仔背上位置可放小物，抱豬迎猴都係唔錯選擇！
價錢：
大豬$188
小豬$128
位置：No.73攤檔
No.5萌物 “This Way”雜錦包
顧名思義”This Way”玩”SUBWAY’概念，賣包！頂癮之處係餡料任君配搭，煙肉其實係薄被、芝士實為毛巾而青瓜蕃茄係坐墊，夠晒玩嘢！集實用、美觀於一身。
價錢：
一套有齊麵包、煙肉、芝士、青瓜乜乜乜 $198
位置：非常好記No.167攤檔
No.6萌物 家肥屋潤賀新年
以各動漫主角為主題，加豐富主角肥肥，猴擒過肥年，cushion造型可愛有肥人魚、肥魔雪公主、肥少女戰士，連Wonder Woman都肥到飛唔起呀！
加入新春特色，本地設計師自家創作，idea唔錯！
價錢：
所有肥公主造型cushion一律 $108
位置：No.85攤檔
No.7萌物 小丸子送暖
多款正版小丸子產品，有小丸子揮春、公仔、利是封，啱晒小丸子迷，連鴨王何浩文同Jeana都專程捧場！
價錢：
揮春 $38
利是封 $15-68不等
小丸子公仔 $198
小丸子暖手公仔 $299
位置：No.51攤檔
No.8萌物 小新造型公仔
攤檔售賣日本動漫公仔，包括美少女戰士、小新、Tsum Tsum、比卡超等，其中小新以過癮造型現身，露出「大象」是常識吧！現場所見，唔少迷倒唔少女士，唔少人左擁右抱小新走人。
價錢：
龍貓造型小新公仔 大$498 小$168
普通造型小新公仔 $128
今年兩大年宵攤檔，其中一邊以和風突圍的攤檔，掛滿粉紅燈籠，唔幫襯齋影相呃like都一流。
多種小食，而必食推介有蠔皇鮑魚30蚊原隻上無取巧，花膠雞煲翅亦係30蚊！
另一邊熟食檔，集各地小食於一身，有台灣芋圓糖水香膠、阿拉伯串燒、地道臭豆腐、炸雪糕等等，一應俱全！
此乃阿拉伯烤肉串燒，比平常的串燒巨型三倍！價錢亦算實惠 $20/串 ，$30/兩串。
前所未見，鵪鶉蛋串，逐隻打落類似整雞蛋仔的廚具，熟透變成鵪鶉蛋串，造型唔錯，但食落同普通煎蛋冇分別，宜影相呃like，價錢較拿利。 價錢：$20/串，$30/兩串
上海臭豆腐 $10/件 近近都聞唔到熟悉的臭豆腐氣味，但10蚊件唔算搶錢！
賣相非常一般嘅炸雪糕，$20/粒，貴！
全文完
如欲率先接收資訊，請讚好我們的FB專頁並於「已讚好」選單設定「搶先看」，多謝支持。
