36歲鄧麗欣為黐王子移船就磡 台灣飲品店生意蝕入肉

娛聞

為愛可以去到幾盡?36歲鄧麗欣(Stephy)就甘為男友王子(邱勝翊)移船就磡,不單密飛台灣會愛郎,早排又密密到當地睇樓計劃置業築愛巢,去年首度投資搞飲品生意,都專登揀在男友地頭台北開業,在信義區開設首間飲品旗艦店「一口吖吖」,躊躇滿志做飲品天后,更揚言希望分店開遍全台灣,可惜一年下來,飲品店生意不似預期,個個月蝕錢,為求止蝕,信義區旗艦店上月已關門大吉,不過,Stephy唔想放棄,寧願大舖搬細舖慳租金,為黐男友蝕住做!

圖文:東方新地

台灣搞生意 為見多男友幾面

得應采兒牽紅線,同方力申甩拖兩年的Stephy,去年初同棒棒堂成員王子(邱勝翊)擦出愛火,拍拖以來愛得如膠似漆,經常在社交網互動放閃,為拉近LongD愛情,Stephy去年更在台灣大搞飲品生意,爭取機會多見男友。

搵番初戀嘅感覺 當正台灣係第二個家

據知情者透露:「同王子一齊之後,Stephy好似搵番初戀感覺咁,對呢段感情好投入,為咗男友,已經當正台灣係佢第二個家,成日讚台灣生活夠自在舒適,不知幾嚮往喺嗰邊生活,為咗黐實男友,仲揀喺台灣搞飲品生意,雖然身邊朋友都有勸佢,話台灣始終唔係自己地方,遙控生意會比較蝕底,但佢為咗愛情變得好盲目,朋友啲勸告都聽唔入耳,上年喺台北如中環地段的信義區正式開咗第一間飲品店,嗰度啲租好貴,但Stephy好有信心,仲話要連鎖式經營,不停睇地方想再開分店!」

貴租搞生意觸礁 撤離豪宅區

不過,生意投資一年不但歸唔到本,更長期蝕錢,上月旗艦店更難頂貴租結業。據知情者透露:「旗艦店開喺商業區嘅地舖,周六同周日幾乎冇生意,台灣手搖飲品業向來競爭大,Stephy飲品嘅價錢唔平又冇乜大特色,平日生意都係麻麻,差不多個個月都蝕錢,為咗唔想長遠蝕落去,間舖上月已經停業,不過,Stephy始終唔想放棄呢盤生意,認為之前可能揀錯地方,依家改咗去中山區誠品入面嘅foodcourt繼續做,嗰度舖租平一大截,人流又多啲,佢希望守多一年再睇吓反應先!」

投資失利可以從頭再來,輸錢贏番愛情,對Stephy來說,投資點計都有賺嘅!

讀者留言