福祿壽十周年演唱會 王祖藍承諾：努力造人
廣告
「福祿壽」王祖藍、李思捷同阮兆祥三子日前舉行咗一連兩場《福祿壽十周年演唱會》，邀請咗好多嘉賓上台，包括李司棋、關菊英、黃凱芹同陳國邦、羅敏莊嘅囡囡陳禛等，而被兩位兄弟催生B嘅王祖藍，就承諾會同老婆李亞男努力「造人」，希望今年計劃可以成功，叫大家放心！
撰文：東方新地｜圖片：新傳媒圖片庫
福祿壽十周年 王祖藍：點可以冇眼淚
「福祿壽」組合踏入十周年，王祖藍同阮兆祥講到三兄弟走過十年唔容易時，都忍唔住喺台上眼濕濕，李思捷話自己都爭啲畀佢哋搞喊：「但驚一喊就收唔到科，所以即刻啜番啲眼淚落去。」祖藍就笑言：「因為我哋成立咗十年，經歷咗好多嘢，所以點可以冇眼淚！」
睇吓陳禛表演，去片：
解散處女黨
祖藍喺台上畀兩位兄弟催生B，不過其後喺三子反串扮Handelababy、Hungry同大Ex講「Girls’ talk」，已經娶咗處女黨成員李亞男嘅王祖藍親自宣布現有嘅處女要解散，因為鍾嘉欣已經生完再生，王君馨同岑麗香結咗婚等生，苟芸慧快將結婚想生，而講到李亞男，祖藍就扮晒喊咁口話：「佢老公唔係好得，唔知幾時生！」認真百無禁忌。
信唔過鄭嘉穎
講到處女黨要招攬新成員進行重組，祖藍指陳凱琳係虔誠教徒，應該信得過，但思捷就話信唔過佢男友鄭嘉穎。問佢哋攞陳凱琳同鄭嘉穎出嚟講笑，有冇事先同佢哋溝通過？思捷話唔使事先溝通，大家都明白只係講吓笑話啫，祖藍就搞笑話：「其實呢個係一個復仇嘅心態，因為佢哋冇嚟到，嚟咗嘅我哋都冇講㗎！你哋唔覺咩？」
