《跳躍生命線》被揭四大漏洞位 救護群組網民睇唔過眼！
撰文：東方新地｜圖片：電視截圖、劇照、網上群組
《跳躍生命線》被揭四大漏洞位
《跳躍生命線》今個星期首播，大家都慨嘆李佳芯第一集出場就死去相當可惜，不過亦網民將重點放到劇集內容真確性上。一個以救護員為主嘅群組熱烈討論劇中「膠位」，依家就一齊睇睇有咩「膠位」！
太過矯情
劇集講到一個爆炸場面，馬德鐘嘅小隊率先到達現場，馬神立馬觀察現場情況後，就即刻大叫一聲「消防處救護員」，幾有氣勢！不過就有該群組網民指該幕相當「膠」，皆因大叫嗰下未免太過矯情！
孭起傷者有錯
其後，馬神更喺抱起傷者前冇對傷者做任何身體檢查，明顯又一個謬誤。不過就有人為該幕辯稱指當時嘅情況危急，大家咪睇下馬神都英勇抱起傷者，可必咁認真喎！
用手檢查救護車？
另外，有一幕講到救護員檢查救護車時，劇中嘅泰仔只用手而冇使用儀器檢查救護車，結果又被網民質疑。
制服有所出入
由於劇集一開始係時光倒流去10年前講起，有網民就指出若然係10年前嘅話，馬神身上嘅制服亦有出現錯誤，因10年前嘅制服嘅「柴」係相對較粗，但劇中嘅制服就相對較幼，似乎有所出入。
雖然有眼利網民睇得出以上漏洞，細節位仍未能盡善盡美，但亦有網民撐指今次劇集嘅製作已經係超越以往TVB嘅製作。唔知大家認唔認同，不過相信今次劇集依然值得大家捧場支持一下嘅！
馬德鐘同太太結婚25年
馬神自離開TVB後，除咗北上拍劇賺人仔，仲進軍飲食業開餐廳，去年又榮升馬主，進軍上流社會！
馬德鐘老婆 晒陳年拍拖照放閃
日前係馬神同太太張筱蘭結婚25周年嘅大日子，馬太喺微博上載咗多張二人由拍拖到結婚嘅相片，並留言話：「由12歲開始認識你，到今天與你結婚步入4份1世紀，感恩一直同行。人生就是要將今天活得比昨天好。銀婚快樂！」
而馬德鐘亦有轉載太太嘅發文，仲留言回應番老婆：「必須要每天都過得比昨天好。」好恩愛啊！
馬德鐘父子型爆晒肌
馬德鐘入行前曾任G4，出晒名高大威猛，正所謂「虎父無犬子」，佢20歲的囝囝馬在驤絕對有爸爸的風範！馬德鐘同老婆張筱蘭就帶埋囝囝享受陽光與海灘，見到佢哋兩父子喺沙灘上大晒fit爆身材，齊齊爆肌！20歲的馬在驤唔單止相貌不俗，而且已經同爸爸差唔多高，盡得優良基因！
去年馬在驤19歲生日，一家三口同埋狗狗Rocky一齊慶祝生日，兩公婆送上一份禮物好特別又有意思，就係囝囝嘅20粒乳齒喇！
嗰頭仲係BB黐實父母，當爸爸心口係床仔瞓，呢頭已經牛高馬大游出香港，天下父母心，都係一樣咁矛盾，又想兒女快高長大出人頭地、又想「叮噹可否不要老」，時間可唔可以過慢啲？又再慢啲呢？
