18同事夾份做人情 新娘po上網公審反被恥笑…
結婚係人生大事,囍事當然想同人分享,而臨近年尾係婚宴高峰期,亦係大家收到「紅色炸彈」的日子,但唔係個個收到「紅色炸彈」都會高興,一講到「做人情」,好多時都係友情大考驗!按照傳統大家都會視乎交情同婚宴地點等因素封上不同金額的「人情」。不過猶記得早年有一名準新娘喺酒店擺酒,但事先聲明「如果給五百元人情就不要來」,結果引來大眾猛烈抨擊!
而近日湖北有位新娘子,一心諗住請晒廿個同事嚟飲,點知有18個甩底,仲要夾份做$1314元人民幣人情贈慶,搞到新娘冇晒面,又嬲又委屈,諗住PO上網公審,點知被一眾網民笑番轉頭!
編輯:東方新地 |原文:SundayKiss|圖片:劇集、電影截圖
一人夾$73蚊做人情
26歲嘅新娘子小徐,喺重慶一間大公司返工,成個部門有20人。同事之間間中都會有拗撬,不過表面關係都叫過得去。今年10月中,小徐宣布結婚,喺鄉下擺完酒,又喺城入面請班親戚朋友同同事飲,派帖嗰陣,個個同事都話人到禮到。
點知,擺酒當日成個部門只係得主管同一個同事代表出席,一張廿人大枱只係坐得兩個人,其餘18人都甩晒底,小徐梗係嬲嬲豬啦!到散咗席,仲要收到同事嘅微信轉賬,18人夾「1,314元」,即係一人夾$73蚊,兼祝小徐同老公「一生一世都相愛」,新娘子又激氣又委屈。