111111

姜皓文「男配」獲兩項提名 黑仔憶述最霉時:冇錢交租、稅局追稅⋯

姜皓文入行32年,今年有兩部電影《拆彈專家》同《大樂師‧為愛配樂》入圍香港電影金像獎「最佳男配角」提名,佢接受本刊喺專訪,憶述入行以來的起跌,最霉嗰段時期冇錢交租、畀稅局追稅,到後來亞視成二線藝員,曾經因為自以為是而變得目中無人,最嚴重時更試過喺廠鬧走節目監製……

撰文:東方新地|圖片:新傳媒圖片庫

姜皓文選電視先生入行

近年港產片幾乎套套佔一席位嘅姜皓文(黑仔),原來最初係選電視先生入行:「86年9月選,其實好偶然,我一路都做緊臨時演員,拍拍吓上咗癮,好想入行,尤其鍾意拍古裝,好鍾意黐住個頭套放食飯去酒樓招搖過市,好似好明星咁,知道有電視先生選舉,拿拿臨攞部傻瓜機,同個朋友互影,影完交form參加,之後就入咗行。」選唔選到都做呢行?姜皓文話:「選唔選到我都覺得係㗎嘞,我之前做過好多嘢,做過地盤、賣點心、工廠、包裝、特技演員、雜技表演⋯⋯一路環繞住娛樂嘅運作,鍾意咗呢行嘅生活,有試過返朝九晚五嘅工,但做唔長。」

姜皓文
姜皓文介紹佢花名黑仔嘅由來:「因為我細個黑黑實實、差仔咁,成日畀人笑我印度仔、印度咖喱雞、髦毛仔……好多花名,入咗行之後,因為我黑黑實實,啲人就叫我黑仔嘞。」
姜皓文
做臨時演員嘅時期,姜皓文話佢最鍾意拍古裝戲,可以黐住個頭套招搖過市。

曾轉行做廚師

姜皓文又講到喺亞視時期,曾試過經濟拮据:「嗰時衰到冇錢交租,稅局又追稅,點解決?見步行步㗎咋,諗到冇嘢諗,買張六合彩睇吓中唔中。」問佢有冇諗過放棄唔做呢行?姜皓文答:「有諗過唔做,有一段時間真係好淡,冇乜人搵我拍嘢,咁咪又開拓咗另外一樣嘢,因為我鍾意煮嘢食,我識咗一班廚師朋友,其中有大酒店嘅總廚,搞過幾年自己煮嘅私房菜,感覺廚師真係幾辛苦,日日困喺廚房,要食人口水尾,因為有時啲客彈番轉頭,要試味。做過幾年之後深深不忿,又出去拍番嘢。」

姜皓文姜皓文曾搞過私房菜,旁邊係佢太太殷寧(原名金慧英)。

姜皓文
姜皓文講到有段時間冇人搵佢拍嘢,佢曾經想轉行做廚師。

姜皓文曾經自以為是

姜皓文自爆喺亞視有一段時間曾經飄飄然、迷失過:「初初上男二、三,掌聲沖昏頭腦,亂咁做、亂咁撞,以為得咗、好掂,有段時間唔珍惜,唔認真去對待一件事,嗰時可能年紀輕、後生,覺得好掂、以為冇咗你唔得,自以為是,有啲迷失。」

姜皓文續說:「後尾冇人搵我做嘢,脾氣大,我試過喺廠鬧個監製,叫個監製出廠,我做一個綜藝節目,嗰時自卑心重,好怕人笑,我眼尾望到人笑,已經唔開心,我直情話:『唔該你出廠,你好影響我!』」

姜皓文

需要時間反省

高峰期,黑仔試過同時開四組戲:「我都唔知幾得閒,我大把期,哈哈!本來唔係想咁,本來排得好地地,點知呢部遲咗開,後面撞埋一齊,咪好似好巴閉,哈哈!」回想當日,姜皓文覺得自己唔成熟:「呢啲咪自己為啖氣、唔成熟、唔去做好嘅後果囉,所有嘅好運咪畀你趕走咗囉,有一段時間好多監製唔用我,自己需要時間反省。」幸好,反省過後仍有機會演出!

姜皓文

恨拍文藝片

入行32年,黑仔拍過不少電影作品,而今年更有兩部電影《拆彈專家》同《大樂師‧為愛配樂》同時入圍「最佳男配角」,問到姜皓文仲有咩角色想做?佢答:「想拍文藝愛情片,唔係動作愛情片,哈!男女主角完全唔襯,但好轟烈嘅愛情片,因為我啱啱拍完《翠絲》,鍾意咗文藝嘅節奏,唔想拍嚟拍去打、開槍,好攰呀!想演繹好輕柔嘅姜皓文畀大家睇。」

姜皓文
姜皓文話唔想成日拍埋啲槍戰同打鬥戲,想拍部愛情文藝片。

 

姜皓文
姜皓文在《大樂師‧為愛配樂》獲提名「男配」!

延伸閱讀:

姚子羚認分訊 胡說八道姊妹陪療傷