【延禧攻略】「傅恒」落機全程黑面拒收fans禮物 許凱否認耍大牌
撰文：東方新地 │圖片：微博、電視截圖、新傳媒圖片
《延禧攻略》一班國内演員，去完無綫錄中秋特備節目後，又要接受傳媒訪問，之後馬不停蹄去到馬鞍山商場出騷！
「瓔珞」吳謹言、「傅恒」許凱同「爾晴」蘇青的威力果然勁，人羣企滿地下至三樓，把成個商場迫爆！
講到憑「魏瓔珞」一角爆紅，有傳吳謹言拍劇及拍廣告都升價十倍，佢話：「劇本和廣告都由公司挑選，我不清楚。」對於新劇《皓鑭傳》吳謹言飾演的李皓鑭性格硬朗，同《延禧》嘅魏瓔珞好似，問擔唔擔心被定型？佢話拍攝此劇時反應表情都唔一樣，所以都可以畀觀眾新鮮感。
至於「爾晴」蘇青接受訪問時，被記者問到《延禧攻略》的監製于正在網上公布會開拍《延禧攻略2》，蘇青爆料話係全新的故事：「用另一種形式把我們再聚在一起。」
為咗今次大台宣傳活動，佘詩曼都特意坐飛機趕返嚟拍攝，對於老拍檔陳豪嘅出現，阿佘話令佢驚喜萬分：「返到呢度(電視城)就好似回到娘家一樣，仲有阿Mo，勾起我好多回憶。」佢話其實一直都有同無綫接洽，所以會有機會再合作。
來到香港，唔多唔少都要講吓廣東話，「傅恒」許凱出席商場活動時用廣東話話：「中秋節快樂！我愛你哋！」台下尖叫聲不絕，而許凱仲同吳謹言耳語，原來現場教授佢用廣東話講：「大家好，中秋節快樂，多謝你哋！」真係識做！
吳謹言同許凱亦合唱，仲同現場觀眾玩遊戲，吳謹言又餵粉絲食湯丸，好親民友善！
許凱大前晚落機時，被指冷待粉絲唔收佢哋嘅禮物兼全程黑面，呢日佢出席商場活動時解畫兼鞠躬道歉：「下機的時候還是被拍醒了，所以太矇，甚麼反應都做不過來，真的對不起。」佢又話錫fans都嚟唔切，只係近來經常四圍飛四出宣傳，身心疲倦，加上有啲唔舒服同喉嚨痛，絕對唔係耍大牌！
講到最近與內地女演員白鹿合演古裝劇《招搖》而傳緋聞，許凱更被影到到女方屋企過夜，他否認：「大家在網上怎麼說，自己控制不到，就不去講了，現在集中工作上，沒有考慮戀愛。」許凱指自己現時單身，但卻不接受姊弟戀。
許凱演《延禧攻略》被封「最帥侍衛」
高顏值小鮮肉許凱喺《延禧攻略》中飾演與女主角魏瓔珞（吳謹言 飾）曖昧嘅富察傅恒，因為呢部劇集擄獲唔少各年齡層女性嘅心，仲人氣急升成為一線小生，被封「最帥侍衛」！
其實許凱唔單止有顏值，演技亦都有返咁上下，充份詮釋到傅恆成熟穩重、足智多謀嘅個性，更被《延禧攻略》嘅製作人于正稱讚係「眼技戲骨」！
于正就話佢眼神憂鬱，特別撩人，大家又覺唔覺呢？
劇中嘅傅性大部分時間都Cool到爆，卻有特別嘅魅力！對其他女人都冷若冰霜，唯獨對女主角魏瓔珞會展開笑容，傅恆深情嘅形象令唔少觀眾都好受落啊！
許凱真係可以話係天生為了古裝而生嘅男人！雖然年輕嘅佢今年先23歲，但天生高大有型，加上一雙濃密劍眉、立體深邃嘅五官，令佢就算著起官服、剃咗光頭都份外有英氣！
許凱被網民大讚擁有星眉劍目，絕招係「側臉殺」！
據聞，許凱仲十分敬業，為咗好好詮釋傅恆呢個角色所以決定提前入劇組讀本，就算要剃光頭都毫不在意！
身高181模特兒出身 時裝都咁型
許凱喺2013年參加中國模特兒大賽，18歲仔就身高181公分，勇奪全國平面組軍，理所當然以模特兒身分出道。
平時許凱鍾意行運動潮流風為主，又鍾意健身！
劇內包到實一實，但原來平時許凱除低戲服係爆肌型男！！！
拍攝古裝仙俠劇《招搖》同女演員白鹿戲假情真
2017年，許凱搭檔女演員白鹿主演古裝仙俠劇《招搖》，點知戲假情真，兩人喺現實生活保持情侶關係，一直交往到依家！
被前女友曝黑歷史
人紅是非多，許凱今年二月被前女友、內地網紅「大金」踢爆疑似家暴事件！雖然被指係炒作，但大金都係企硬！
事情愈滾愈大，令許凱嘅經理人公司要出聲明維護返許凱。
但係討論度愈嚟愈高嘅時候，許凱竟然出文承認自己曾經係「壞男生」！
究竟現實中嘅許凱係咪同劇中嘅深情傅恆判若兩人呢？呢啲嘢就好難講啦！小編都係繼續煲劇算啦～
