Stephy

姊妹幫口催婚 鄧麗欣台灣置業等嫁王子

眨下眼鄧麗欣同台灣男友王子(邱勝翊)下個月便拍拖滿一周年,兩人愈愛愈高調,對這段情極之投入的Stephy ,為拉近同男友Long D距離,上年十月在台北信義區投資開設飲品店,攞正牌密飛台灣會男友,原來Stephy近期更密密在當地睇樓睇舖,計劃在男友王子寓所南港區開第二間分店,以及買樓「落地生根」,講到出口唔排除有閃婚可能的她,上年四月喺王子生日爆出戀情,唔知今年四月王子30歲生日,兩人會唔會爆埋婚訊呢?!

撰文:東方新地 圖片:新傳媒圖片、Instagram

鄧麗欣 台灣置業等嫁王子

16年同方力申分手,單身兩年的Stephy 雖然傳出過同排球隊教練小牛撻著,又傳過同方力申復合,終於去年初遇上真愛,得好友應采兒牽線同台灣棒棒堂成員王子發展姊弟戀,無懼六年年齡差距異地分隔,拍拖兩個月,已經愛得癡纏同飛蘇梅島為王子慶生定情。

鄧麗欣
投資開飲品店都揀飛去台灣開,可想而知鄧麗欣有幾重視同台灣男友王子的戀情,雖然飲品店開幕當日男友未有現身,不過王子都好識冧女友,專登和Stephy 在飲品店同一個位影相放上lG,放閃撐女友!

陪足兩日慶生

完全畀王子溫柔溶化的Stephy 亦一改以往低調作風,同王子拍拖以來就不停放閃,兩人在IG不時留言傳情,上年10月Stephy 35歲生日,她更選擇飛到台灣搞飲品店開幕,趁機會男友,王子還為她大搞神秘生日會。據知情者透露:「自從同王子拍拖之後, Stephy 簡直好似初戀感覺返晒嚟!因為王子性格溫柔又夠浪漫,成日會講甜言蜜語氹佢,係女仔都鍾意畀人錫畀人呵護啦!上年Stephy 生日,王子連環送驚喜幫Stephy連續兩日慶生,除咗約齊大班朋友一齊慶祝,又安排一日過二人世界,諗得咁周到咁細心, Stephy 點會唔冧吖!」