譚輝智叫超級粉絲拉姑唔好變心 曾志偉許願盼中2生繼續開騷

呢晚譚輝智就繼續施展佢嘅獨門舞技跳唱，佢仲一度走落台同超級fans拉姑擁抱，原來拉姑早有準備嚟見偶飲，仲特別訂咗個輝智公仔嚟送畀佢，慶功宴上譚輝智話估唔到拉姑會送個公仔畀自己，又話佢喺台上見到拉姑時都好激動，加上對方連續兩晚嚟撐場，所以忍唔住落台嘅時候要去攬一攬對方，譚輝智仲話自己受寵若驚，仲搞笑咁對住拉姑送畀佢嘅公仔問：「多謝你呀拉姑，點解會鍾意我嘅？點解嘅？我有啲咩好呀？」相當搞笑。之後譚輝智又話自己會繼續努力繼續唱，希望拉姑會聽之餘，亦唔好咁快變心呀！

演唱會尾聲時，一眾中2生紛紛爆喊，佢哋仲公開多謝家人一直不離不棄咁支持佢哋去追夢。而完騷後喺慶功宴上，中2生就為曾志偉補祝生日，志偉話自己一直都有留意中2生嘅比賽進程，又話睇完今次呢個騷好感動，佢又話成個演唱會入面最難忘係台下fans係咁大嗌叫輝智跳舞，志偉話：「咁鍾意睇佢跳舞㗎咩？點知佢真係又跳，佢仍然保持係咁難睇喎！」至於問到演唱會會唔會有part 2，志偉就話今次唔夠喉，所以生日願望都係想佢哋繼續開騷呀。

平日斯斯文文嘅黃劍文，喺演唱會上就為觀眾帶嚟連串歌舞，令大家相當有驚喜，劍文就話要多謝排舞老師令佢可以夢想成真。而開騷當晚撞正媽媽生日嘅顏米羔，佢嘅fans米粉就為顏媽媽準備咗蛋糕慶祝，顏米羔話頭場喺台上見到媽咪時已經感動到爭啲唱唔到落去，所以第二晚喺台上刻意避開媽咪唔望對方呀。

網民點睇？

第二晚演唱會FC靚聲王唱李香蘭情感細緻，音質優美，唱快歌”屈到病” 生鬼又奔放，真係冇得輸! 👍🏼👍🏼👍🏼👏🏼👏🏼👏🏼

輝智永遠支持您，不會變心，百聽不厭的歌聲。❤❤❤❤❤❤❤❤❤❤

Thanks中年好聲音2演唱會
永遠支持FC輝智mic-GO米羔
兩位唱歌真係好聽加油❤️🧡🎶💪

即刻Follow TVB 娛樂新聞台 Facebook專頁 https://www.facebook.com/TVBENews

登入myTV SUPER享受睇TVB自製節目7日包括娛樂新聞的免費點播 https://bit.ly/2TXLlM0